برقی گاڑیوں سے خلا میں نجی سیٹلائیٹس بھیجنے والے ایلون مسک نے کہا ہے کہ جب تک ٹوئٹرجعلی اکاؤنٹس کے حوالے سے وضاحت نہیں دے گا، اس وقت تک اس معاہدے میں پیش رفت نہیں ہوگی۔

ٹیسلا اوراسپیس ایکس کے بانی ایلون مسک اورٹوئٹرکے درمیان اس مائیکروبلاگنگ پلیٹ فارمزکوخریدنے کے لیے ہونے والے معاہدے میں رکاوٹیں حائل ہوگئی ہیں۔

اس بابت ایلون مسک کا اپنی ٹوئٹ میں کہنا ہے کہ ٹوئٹرکی خریداری کے معاملے میں اس وقت تک مزید پیش رفت نہیں ہوگی جب تک انتظامیہ بوٹس ( سافٹ ویئرکی مدد سے چلنے والے اکاؤنٹس) کے حوالے انہیں یقین دہانی نہیں کروا دیتی۔

ایلون مسک نے گزشتہ ماہ ہی مائیکرو بلاگنگ ویب سائٹ ٹوئٹرکو44 ارب ڈالرمیں خریدنے کا معاہدہ کیا تھا تاہم جعلی اوربوگس اکاؤنٹس کی وجہ سے گزشتہ دنوں انہوں نے اس معاہدے کوہولڈ کرنے کا اعلان کردیا تھا۔

ٹیکنالوجی کے میدان میں تاریخ کے سب سے بڑے معاہدے کو ہولڈ کرنے کے حوالے سے ایلون مسک کا کہنا ہے کہ ’’ٹوئٹر پر جعلی اوراسپیم اکاؤنٹس کی بڑی تعداد کی وجہ سے اس معاہدے کوعارضی طورپرروکا گیا ہے۔ ‘

ایلون مسک کی اس ٹوئٹ کے بعد چند ہی گھنٹوں میں ٹوئٹر کے حصص کی قیمتوں میں 20 فیصد سے زائد کمی ہوگئی تھی۔

مسک نے اپنی ٹوئٹ میں دو مئی کو رائٹرزپر شایع ہونے والی ایک رپورٹ کا لنک بھی منسلک کیا تھا، جس میں ٹوئٹرکوجعلی اوربوگس اکاؤنٹس کی وجہ سے درپیش مسائل کواحاطہ تحریرمیں لایا گیا ہے۔

Twitter deal temporarily on hold pending details supporting calculation that spam/fake accounts do indeed represent less than 5% of usershttps://t.co/Y2t0QMuuyn

— Elon Musk (@elonmusk) May 13, 2022

دوسری جانب ٹوئٹرکے چیف ایگزیکٹو آفیسرپراگ اگروال کا اس حوالے سے کہنا ہے کہ ’ہم اپنے پلیٹ فارم سے روزانہ تقریبا 5 لاکھ بوگس اکاؤنٹس معطل کررہے ہیں، جب کہ لاکھوں اکؤنٹس کوانساںوں کے بجائے سافٹ ویئر( بوٹس) کے ذریعے چلائے جانے کی تصدیق بھی کی جارہی ہے۔‘

ایلون مسک نے اگر وال کی ٹوئٹ پر ’POO‘ ایموجی کے ساتھ رد عمل دیتے ہوئے ان جعلی اکاؤنٹس کو ’بوٹس طاعون‘ قراردیتے ہوئے کہا ہے کہ اس پلیٹ فارم کا مالک بننے کے بعد سب سے پہلی ترجیح اس طاعون سے نجات حاصل کرنا ہوگی۔

یاد رہے کہ فاربس جریدے کے مطابق دنیا کے امیرترین افراد کی فہرست میں شامل اسپیس ایکس کے سربراہ ایلون مسک کے مجموعی اثاثے 230 ارب ڈالر سے زائد ہیں۔

مسک نے ٹوئٹرکوخریدنے کا اعلان کرکے دنیا بھر کے سرمایہ کاروں کو حیرت زدہ کردیا تھا۔ ان کے دوست انہیں روایت شکن ذہین ترین آدمی کہتے ییں جب کہ ناقدین کی نظر میں ایلون مسک بڑائی کے خبط میں مبتلا ضدی آدمی ہیں۔