فواد احمد جو پاکستان کے دورے پر آسٹریلیا کے اسپن باؤلنگ کنسلٹنٹ تھے، نے کہا کہ آسٹریلوی کھلاڑی پاکستانی لوگوں کے ساتھ ہمدردی رکھتے  ہیں۔

تفصیلات کے مطابق کرکٹ پاکستان کے ساتھ ایک خصوصی انٹرویو  فواد احمد نے پی سی بی کو مشورہ دیا کہ اگر اسٹیڈیمزکے ساتھ ہوٹل بنائے جائیں تو چیزیں آسان ہو جائیں گی۔

آسٹریلوی لیگ اسپنر نے کہا کہ ٹیموں کو صدارتی سطح کی سیکیورٹی فراہم کی گئی تھی ، سیکیورٹی حیرت انگیز تھی، حکومت اور پی سی بی دونوں نے اس بات کو یقینی بنانے کے لیے لاکھوں ڈالر خرچ کیے کہ سیریز آسانی سے چلی اور انہوں نے ہمیں صدارتی سطح کی سیکیورٹی کی پیشکش کی۔

فواد احمد نے کہا کہ میں نے کئی آسٹریلوی کھلاڑیوں کو سنا جنہوں نے اس بارے میں بات کی کہ ان کی آمد کی وجہ سے لوگوں کو کس طرح تکلیف ہو رہی ہے ،یہ بہت اچھا ہوگا اگر پی سی بی واقعی اسٹیڈیم کے ساتھ ہوٹل بنانے کے اپنے منصوبوں پر عمل کرے ، اس طرح وہ روزانہ کی بنیاد پر سیکیورٹی پر خرچ ہونے والی رقم کو محدود کر سکتے ہیں ۔

لیگ اسپنر نے آسٹریلوی کھلاڑیوں کو پاکستان کے ہجوم کی جانب سے ملک کے تاریخی دورے پر ملنے والی حمایت کی بھی تعریف کی۔

فواد احمد نے مزیدکہا کہ کھلاڑیوں نے کھانے کے معیار کے بارے میں بہت زیادہ بات کی اور دعوی کیا کہ یہ برصغیر کے دیگر ممالک کے مقابلے بہت بہتر ہے، وہ خاص طور پر اسلام آباد اور لاہور کے کھانوں سے لطف اندوز ہوئے۔