حافظ حمد اللہ نے کہا ہے کہ عمران نیازی حقیقی آزادی کے نام پر آزاد پاکستان نہیں ایک خونی پاکستان چاہتا ہے۔

ترجمان پی ڈی ایم حافظ حمد اللہ نے 25 مئی اسلام آباد لانگ مارچ اور آج کی صورتحال پر بیان میں کہا کہ پی ڈی ایم لاہور میں کانسٹیبل کمال احمدخان کی شہادت پراہل خانہ سےاظہار تعزیت کرتی ہے۔

حافظ حمد اللہ نےکہا کہ عمران نیازی نے ٹائیگرفورس کے ہاتھوں ریاستی فورس کا قتل کیا۔

انہوں نے یہ بھی کہا کہ پولیس کانسٹیبل کی شہادت سے ثابت ہوا کہ یہ خونی مارچ ہوگا جس کا اعلان سابق بد زبان وزیر نے پہلے ہی کیا تھا کہ اسلام آبادمارچ خونی ہوگا۔

حافظ حمد اللہ کا کہنا تھا کہ عمران اینڈ گوگی گینگ حقیقی آزادی کے نام پر آزاد پاکستان نہیں ایک خونی پاکستان چاہتا ہے، اتحادی حکومت عمران نیازی کے منفی عزائم کو کبھی بھی کامیاب نہیں ہونے دینگے۔

ترجمان پی ڈی ایم حافظ حمد اللہ کا مزید کہنا تھا کہ 2014میں جمہوریت کے نام پر گوگے خان نے پارلیمنٹ،پی ٹی وی عمارت پر بھی حملہ کیا۔ یہ خونی مارچ آئین، قانون، جمہوریت اور ریاست کے خلاف کھلی بغاوت ہے۔

دوسری جانب پی ٹی آئی کے آزادی لانگ مارچ کو ناکام بنانے کیلئے حکومت نے کمر کس لی ہے، ایک طرف گرفتاریوں کا سلسلہ شروع تو دوسری طرف شہر اقتدار کی اہم شاہراہوں کو کینٹینر ز لگا کر بند کیا جا رہا ہے۔

علاوہ ازیں اسلام آباد ہائیکورٹ نے پاکستان تحریک انصاف (پی ٹی آئی) کے کارکنوں کو ہراساں کرنے سے روک دیا، عدالت نے آئی جی اسلام آباد، چیف کمشنر اور ڈپٹی کمشنر اسلام آباد کو نوٹس جاری کردیئے۔

چیف جسٹس اسلام آباد ہائی کورٹ نے ڈپٹی کمشنراورآئی جی اسلام آباد کو ہدایت کی کہ کسی پی ٹی آئی کارکن کو غیر ضروری ہراساں نہ کریں۔

واضح رہے کہ عمران خان کی جانب سے لانگ مارچ کے اعلان کے بعد پولیس نے لاہور سمیت پنجاب، کراچی اور اسلام آباد کے مختلف علاقوں میں پی ٹی آئی رہنماؤں اور کارکنوں کے گھروں پر چھاپے مارے ہیں۔

رپورٹس کے مطابق پولیس کی کارروائیوں کے دوران پاکستان تحریک انصاف کے درجنوں کارکنوں کو حراست میں لیا گیا ہے۔