ملک بھر میں گرمی کی شدت میں اضافے کا ایک اور الرٹ جاری کردیا گیا ہے۔

محکمہ موسمایت کی جانب سے جاری کیے جانے والے الرٹ کے مطابق آئندہ پورے ہفتے ملک بھر میں گرمی کی شدید لہریں متوقع ہیں۔

محکمہ موسمیات نے بتایا ہے کہ آئندہ ہفتہ کے دوران موسم کی شدت میں اضافے کے سبب پنجاب کے بالائی علاقوں میں دن کے وقت درجہ حرارت معمول سے 7 تا9  ڈگری زیادہ رہنےکا امکان ہے

آئندہ ہفتے پنجاب کے وسطی و جنوبی علاقے بھی شدید گرمی کی لپیٹ میں رہیں گے جبکہ جنوبی و وسطی پنجاب میں دن کے اوقات میں درجہ حرارت معمول سے 6 تا 8 ڈگری بلند رہے گا۔

گرمی کی شدت کے سبب آبی ذخائر،فصلوں اور باغات کو پانی کی ترسیل میں کمی  جبکہ توانائی کی طلب میں مزید اضافے کے بھی امکانات ہیں۔

پنجاب  ڈیزاسٹر مینجمنٹ اتھارٹی کی جانب سے تمام متعلقہ اداروں کوموسم میں شدت کے سبب ہنگامی حالات میں فوری امدادی کاروائیوں کے احکامات جاری کیے جا چکے ہیں۔

خیال رہے کہ آج پنجاب میں پارہ 44 ڈگری کو چھوئے گا جبکہ اسلام آباد میں موسم گرم اور خشک رہے گا۔

اسکے علاوہ شہر کراچی میں درجہ حرارت 40 ڈگری سینٹی گریڈ ، حیدرآباد میں 44 ڈگری سینٹی گریڈ، رحیم یار خان میں 45  ریکارڈ کیا گیا ہے ۔

بلوچستان کے ساحلی علاقے گوادر میں درجہ حرارت 37 ڈگری سینٹی گریڈ ریکارڈ کیا گیا ہے جبکہ تربت میں درجہ حرارت 46ڈگری سینٹی گریڈ  ریکارڈ کیا گیا ہے۔

یاد رہے کہ ملک کے وسطی اور جنوبی میدانی اضلاع میں گردآلود ہوائیں چلنے کا امکان ہے۔