ادرک کا شمار ان سبزیوں میں ہوتا ہے جنہیں ان کی غذائیت اور صحت بخش اجزاء  کی بنا پر سپر فوڈ میں شامل کیا گیا ہے یہی وجہ ہے کہ ادرک کا استعمال صدیوں سے کھانے میں ذائقہ بڑھانے کے لئے کیا جاتا ہے جبکہ اسے اینٹی بیکٹیریل خصوصیات کی بنا پربطور دوا بھی استعمال کیا جاتا ہے۔

 ہاضمے کی خرابی اور متلی میں اس کا استعمال کسی مسیحا سے کم نہیں۔ اس کی تاثیر گرم ہوتی ہے۔ یوں تو اس حیرت انگیز سبزی کی بے پناہ افادیت ہے لیکن کچھ کیفیات یا بیماری کی صورت میں اسے غذا میں شامل رکھنا نقصان کا باعث بن سکتا ہے۔

حاملہ خواتین

ادرک میں پائے جانے والے اجزاء پٹھوں کی صحت بڑھانے اور نظام انہضام کو بہتر بنانے میں اہم کردار ادا کرتے ہیں۔ تاہم حاملہ خواتین میں اس کا استعمال بچے کی قبل از وقت پیدائش کا سبب بن سکتا ہے خاص طورپر حمل کے آخری تین ماہ اس حوالے سے نہایت اہمیت رکھتے ہیں اس لئے حمل کے اس دور میں ادرک کے استعمال سے گریز کامشورہ دیا جاتا ہے۔

مخصوص ادویات کا استعمال

ایسے افراد جو بلڈ پریشر اور ذیابیطس کے لئے مخصوص ادویات استعمال کرتے ہیں ادرک ان ادویات کے اثرات کو کم کر سکتی ہے جس سے مرض میں بگاڑ پیدا ہوسکتا ہے۔

 پتھری

اگر آپ پتے میں پتھری کا شکار ہیں تو ادرک کا استعمال خطرناک ثابت ہوسکتا ہے کیو نکہ یہ پتھری بننے کی عمل کو بڑھا دیتی ہے۔

وزن کم ہے

وزن کم ہے تو ادرک کا استعمال اسے مزید کم کر دے گا۔ ادرک ریشوں یعنی فائبرسے بھرپور ہوتی ہے یہی وجہ ہے کہ  اس کے استعمال سے پیٹ کی پی ایچ بڑھ سکتی ہے اور ہاضمہ تیز کرنے والے عوامل متحرک ہوسکتے ہیں اس طرح چربی بطور ایندھن استعمال ہونے لگے گی،  فائبر سے بھرپور ہونے کی بنا پر پیٹ بھرا رہتا ہے اور بھوک کی خواہش نہیں رہتی اس طرح  وزن میں کمی ہونے لگتی ہے۔ اگر آپ وزن بڑھانا چاہتے ہیں تو ادرک کا استعمال کم کر دیں۔