عاصم افتخار نے کہا ہے کہ پاکستان نے 20 بھارتی قیدیوں کو رہا کر دیا ہے۔

ترجمان دفترخارجہ عاصم افتخار نے کہا ہے کہ حکومت پاکستان نے آج 20 بھارتی قیدیوں کو سزا پوری ہونے پر رہا کر دیا ہے، ان بھارتی قیدیوں میں ماہی گیر شامل تھے۔

انہوں نے کہا کہ بھارتی ماہی گیروں کو واہگہ بارڈر کے راستے بھارت بھیجا گیا، پاکستان توقع کرتا ہے کہ قیدیوں کے معاملے کی انسانی ہمدردی کے پیش نظر بھارتی حکومت اسی جذبے سے جواب دے گی۔

اس سے قبل ترجمان دفتر خارجہ عاصم افتخار نے پناہ گزینوں کے عالمی دن کے موقع پر کہا تھا کہ پاکستان پناہ گزینوں کے عالمی دن کی یاد میں عالمی برادری کے ساتھ شامل ہے، اس دن کو مناتے ہوئے ہم دنیا بھر میں پناہ گزینوں کے ساتھ اپنی یکجہتی کا اظہار کرتے ہیں۔

انہوں نے کہا تھا کہ دن منانے کا مقصد ہے کہ ہم جبری نقل مکانی کے محرکات پر غور کریں اور پناہ گزینوں کے حالات کے لیے پائیدار حل تلاش کرنے کے لیے اپنے عزم کا اعادہ کریں۔

عاصم افتخار نے کہا تھا کہ پاکستان نے چار دہائیوں سے  دنیا کے سب سے بڑے اور طویل ترین مہاجرین کے حالات میں سے ایک کی ذمہ داری اپنے کندھوں پر ڈالی ہے، پاکستان 30 لاکھ سے زائد افغان مہاجرین کی میزبانی کر رہا ہے۔

ترجمان دفتر خارجہ نے کہا تھا کہ پاکستان کے عوام نے ملک میں پناہ گزینوں کے لیے مثالی سخاوت، مہمان نوازی اور ہمدردی کا مظاہرہ کیا ہے، جیسے جیسے دنیا بھر میں نئے حالات ابھر رہے ہیں، بین الاقوامی برادری کو افغان مہاجرین کی دیرینہ صورتحال کو فراموش نہیں کرنا چاہیے۔

انہوں نے کہا تھا کہ افغانستان کے استحکام اور پائیدار سماجی و اقتصادی ترقی کے لیے ضروری اقدامات اٹھانا بھی اتنا ہی اہم ہے، اس دن پاکستان اقوام متحدہ کے ہائی کمشنرز برائے پناہ گزین  کو خصوصی خراج تحسین پیش کرتا ہے۔

عاصم افتخار نے کہا تھا کہ پاکستان یو این ایچ سی آر کے ساتھ اپنی قابل قدر شراکت داری کو مزید مستحکم کرنے کا منتظر ہے، ہم بین الاقوامی برادری سے مطالبہ کرتے ہیں کہ وہ دنیا بھر میں پناہ گزینوں کے لیے پائیدار حل کے لیے اس کی کوششوں میں تنظیم کا ساتھ دیں۔