گورنر پنجاب محمد بلیغ الرحمان نے کہا ہے کہ حکومت سی پیک کے تحت جاری ترقیاتی منصوبوں کو تیزی سے آگے بڑھانے کیلئے پرعزم ہے۔

محمد بلیغ الرحمان سے چین کے لاہور میں نئے تعینات ہونے والے قونصل جنرل ژاؤ شیرین کی ملاقات ہوئی جس میں دو طرفہ تعلقات اور سی پیک پر تبادلہ خیال کیا گیا۔

ملاقات میں گورنر پنجاب نے لاہور میں قونصل جنرل کی ذمہ داری سنبھالنے پر ژاؤ شیرین کے لئے نیک خواہشات کا بھی اظہار کیا۔

بلیغ الرحمان نے گفتگو کرتے ہوئے کہا کہ چائنہ اور پاکستان کی دوستی لازوال ہے، چائنہ نے ہر مشکل وقت میں پاکستان کا ساتھ دیا ہے۔

انہوں نے کہا کہ پاکستان چائنہ اقتصادی راہداری صرف پاکستان نہیں بلکہ خطے اور پوری دنیا کے لیے ایک گیم چینجر ہے، پالیسیوں کے تسلسل لے لیے چارٹر آف اکانومی ہونا چاہیے۔

گورنر پنجاب کا کہنا ہے کہ حکومت سی پیک کے تحت جاری ترقیاتی  منصوبوں کو وزیراعظم شہباز شریف کی قیادت میں تیزی سے آگے بڑھانے کے لیے پرعزم ہے۔

انہوں نے کہا کہ چائنہ کی تعلیم اور صحت، انرجی انفراسٹرکچر اور دیگر شعبوں میں تعاون کو قدر کی نگاہ سے دیکھتے ہیں، سی پیک سے پاکستان میں انفراسٹرکچر، ایگری کلچر، انرجی سیکٹر اور انڈسٹری میں ترقی کی نئی راہیں کھلیں گے۔

بلیغ الرحمان نے مزید کہا کہ سی پیک کی بہت سی جہتیں ہیں جن سے پاکستان میں تعمیر اور ترقی کی نئی راہیں کھلیں گی، پاکستان اور چین کے درمیان عوامی سطح پر رابطے مزید مضبوط بنائیں گے۔

دوسری جانب چینی کونسل جنرل نے کہا کہ پاکستان میرا دوسرا گھر ہے، امید ہے حکومت سی پیک کے تحت منصوبوں کو جلد مکمل کرے گی۔