شہر قائد کے مختلف علاقوں میں بوندا باندی ہونے کے باعث موسم خوشگوار ہوگیا ہے۔

تفصیلات کے مطابق کراچی شہر میں پری مون سون بارشون کے سلسلے کا آغاز ہوگیا ہے جس بعد گرمی کا زور ختم ہونے کے ساتھ ساتھ موسم خوشگوار ہوگیا ہے۔

جمعہ کی صبح ڈی ایچ اے، سی ویو، کلفٹن، ایم اے جناح روڈ، گرومندر، ٹاور سمیت ناظم آباد، سرجانی، نارتھ کراچی میں سے بھی بوندا باندی رپورٹ کی گئی ہے۔ 

محکمہ موسمیات نے آج رات تک بوندا باندی اور کل ہلکی بارش کی پیشگوئی کردی ہے جبکہ  گلشن معمار ، سپر ہائی وے،سہراب گوٹھ پر بھی بوندا باندی کا سلسلہ جاری ہے۔

دوسری جانب محکمہ موسمیات کا کہنا ہے کہ شہر میں 25 جون سے  مون سون کا پہلا اسپیل بارش برسائے گا البتہ آج بھی صبح و شام کے اوقات میں بوندا باندی کا امکان ہے۔

محکمہ موسمیات نے بتایا کہ آج کراچی میں  موسم گرم اور مرطوب رہے گا جبکہ کم سے کم درجہ حرارت 29.5 ڈگری اور زیادہ سے زیادہ درجہ حرارت 36ڈگری سینٹی گریڈ ریکارڈ ہونے کا امکان ہے۔

محکمہ موسمیات کا مزید کہنا تھا کہ ہوا میں نمی کا تناسب زیادہ ہونے سے گرمی کی شدت زیادہ محسوس کی جائے گی جبکہ شہر میں 20 کلو میٹر فی گھنٹہ کی رفتار سے ہوا چل رہی ہیں۔