ڈاکٹر یاسمین راشد نے کہا ہے کہ امپورٹڈ حکومت پنجاب میں غیر جمہوری رویہ اپنا کر بے نقاب ہو چکی ہے۔

پاکستان تحریک انصاف سینٹرل پنجاب کی صدر ڈاکٹر یاسمین راشد اور حماد اظہر نے جیل روڈ آفس میں پارٹی رہنماؤں سے ملاقاتیں کیں جس میں ضمنی انتخابات کے حوالے سے تبادلہ خیال کیا گیا۔

ملاقات کرنے والوں میں ملک ظہیر عباس کھوکھر، عندلیب عباس، سابقہ اراکین قومی اسمبلی رخسانہ نوید،  ڈاکٹر سیمی بخاری،  نوشین حامد، طارق حمید ، اویس یونس، شنیلا علی، ڈاکٹرعظیم الدین لکھوی، روبینہ شاہین، ثانیہ کامران، ڈاکٹر عاطف الدین اور وسیم قادر شامل تھے۔

ڈاکٹر یاسمین راشد نے پارٹی رہنماؤں سے گفتگو کرتے ہوئے کہا ہے کہ آج پنجاب میں فاشسٹ حکومت ہے، آئین کی دھجیاں بکھیری جارہی ہیں، غیر قانونی اجلاس منعقد کیے جا رہے ہیں۔

انہوں نے کہا کہ پنجاب اسمبلی کے اندر حکمران اتحاد کا غیر جمہوری رویہ تھا، پنجاب میں حکمران آئین سے کھلا مذاق کر رہا ہے، پنجاب کی فاشسٹ حکومت کے غیر قانونی ہتھکنڈوں کی شدید الفاظ میں مذمت کرتے ہیں۔

پاکستان تحریک انصاف سینٹرل پنجاب کی صدر نے کہا کہ پنجاب کی امپورٹڈ حکومت اپنی ساکھ کھو چکی ہے، امپورٹڈ حکومت پنجاب میں غیر جمہوری رویہ اپنا کر بے نقاب ہو چکی ہے۔