عدالت نے سرکاری اشتہارات میں خورد برد کے نیب ریفرنس میں آئندہ سماعت پر سابق وفاقی سیکریٹری کو طلب کر لیا۔ 

احتساب عدالت اسلام آباد میں سرکاری اشتہارات میں خورد برد کے نیب ریفرنس میں سابق وزیراعظم یوسف رضا گیلانی اور دیگر کیخلاف کیس کی سماعت ہوئی۔

احتساب عدالت کے جج اعظم خان نے ریفرنس کی سماعت کی۔

شریک ملزم و سابق وفاقی سیکرٹری فاروق اعوان نے نئے نیب قانون کے تحت درخواست دائر کردی۔

نیب پراسیکیوٹرعثمان مسعود مرزا نے کہا کہ نیب قانون کا معاملہ سپریم کورٹ میں جا چکا ہے۔ سپریم کورٹ میں نئے قانون کو چیلنج کیا گیا ہے۔ احتساب عدالت کے حکم کے باوجود ملزم فاروق اعوان پیش نہ ہوا۔

احتساب عدالت نےآئندہ سماعت پر سابق وفاقی سیکریٹری فاروق اعوان کو دوبارہ طلب کرلیا۔

جج اعظم خان نے کہا کہ ملزم آئندہ سماعت پر پیش نہ ہوا تو حاضری سے مستقل استثنی ختم کر دیں گے۔

احتساب عدالت نے سماعت مزید کارووائی کیلئے 18جولائی تک ملتوی کردی۔

یوسف رضا گیلانی اور دیگرپریونیورسل سروسز فنڈز کے اشتہارات کی مد میں کروڑوں روپے کی کرپشن کا الزام ہے۔

دوسری جانب توہین مذہب اور پی ٹی آئی لانگ مارچ کے تناظر میں درج مقدمات کے خلاف درخواست پرعدالت نے شیخ رشید، اسد قیصر ودیگر کی گرفتاری سے روکنے کے حکم میں 13 ستمبر تک توسیع کردی۔

اسلام آباد ہائی کورٹ کے چیف جسٹس اطہرمن اللہ نے دلائل کے بعد احکامات جاری کیے۔