فضیلہ قاضی پاکستانی ڈرامہ انڈسٹری میں کسی تعرف کی محتاج نہیں ہے وہ ایک باصلاحیت اداکارہ، پروڈیوسر، میزبان ہونے کے ساتھ عمدہ شیف بھی ہیں۔ انہوں ماڈلنگ سے اپنے کیریئر کا آغاز کیا پھر ڈراموں میں اپنی بے مثال اداکاری سے سب کو اپنا گرویدہ بنالیا۔ فضیلہ قاضی اکثر اپنے انٹرویو میں معاشرے کے مسائل اجاگر کرتی ہوئی نظر آتی ہیں تاہم اس بار انہوں نے پاکستانی ڈرامہ انڈسٹری کے تاریک پہلو کے بارے میں اپنی رائے کا اظہار کیا۔

فضیلہ قاضی نے حال ہی میں اپنے ایک انٹرویومیں میں پاکستانی ڈرامہ انڈسٹری کے بارے میں اپنی رائے کا اظہار کرتے ہوئے کہا کہ یہاں پر اقربا پروری ہے لوگ اداکاری کے بجائے دوستیوں کو زیادہ اہمیت دیتے ہیں۔

 ان کا کہنا تھا کہ شوبز انڈسٹری چمک اور گلیمر سے بھری ہوئی ہے اور یہی وجہ ہے لوگ ہمیشہ اس پیشے میں شامل ہونے کی کوشش کرتے ہیں اور نوجوان لڑکے اور لڑکیاں اسٹار بننے کے لئے ڈرامہ انڈسٹری کا رخ کرتے ہیں لیکن چیزیں اتنی آسان نہیں جتنا کہ لوگ سوچتے ہیں۔

انہوں نے مزید کہاکہ اس صنعت کو کیمپوں میں تقسیم کر دیا گیا ہے جس میں لوگوں کا ایک گروپ بار بار ایک ساتھ کام کر رہا ہے اور اداکار اسی کے ساتھ کام کرنے کا کہتے ہیں۔

فضیلہ قاضی نے کہا کہ اسی اقربا پروری کی وجہ سے کچھ اداکاروں کو موقع دیا جاتا ہے چاہے وہ اس کردار کے لئے موزوں نہ ہو، دوستیوں اور گروپ بندیوں کی بنیاد پر کرداروں کی تقسیم ہوتی ہے جبکہ وہ خود بھی ان کرداروں کو کھو چکی ہیں جن کی وہ حقدار تھی۔

جبکہ ان کا یہ بھی کہنا تھا کہ اکثر اداکار ڈرامہ میں کسی دوسرے اداکار سے خود کو غیر محفوظ سمجھتے ہیں تو یہ اس کا مسئلہ ہے اور کہنے لگتے ہیں کہ یہ تو تنگ کرتی ہیں انہیں سے بات کر لیں وہ کم پیسوں میں کام کر لیں گے۔ تاہم اب انہوں نے سیکھ لیا ہے کہ ایسے حالات سے کیسے نمٹا جاتا ہے اور وہ ایسے لوگوں کو براہ راست شیٹ اپ کال دیتی ہیں۔