راجہ اظہر نے کہا ہے کہ پی ٹی آئی کے احتجاج کو دیکھ کر بلاول بھٹو کی ٹانگیں کانپ رہی ہیں۔

پی ٹی آئی رکن سندھ اسمبلی راجہ اظہر نے کراچی میں خطاب کرتے ہوئے کہا کہ مہنگائی کے خلاف احتجاج کی جگہ چھوٹی پڑ گئی ہے۔

 انہوں نے کہا کہ سندھ پولیس نے پی ٹی آئی کے رکن سندھ اسمبلی شبیر قریشی کو جھوٹے مقدمے میں گرفتار کیا ہے۔

راجہ اظہر کا کہنا تھا کہ پی ٹی آئی کے مہنگائی کے خلاف احتجاج کو دیکھ کر آصف زرداری اور بلاول بھٹو کی ٹانگیں کانپ رہی ہیں۔

پی ٹی آئی رکن سندھ اسمبلی راجہ اظہر کا مزید کہنا تھا کہ وزیراعلیٰ مراد علی شاہ تم باز آجائو، ہمارے لوگوں کے خلاف کارروائی بند کرو۔

اس موقع پر پی ٹی آئی رہنما آفتاب صدیقی نے خطاب کرتے ہوئے کہا کہ احتجاج کے لئے جگہ کم پڑ گئی، عوام کی بڑی تعداد ابھی تک راستے میں ہے۔

انہوں نے کہا کہ امپورٹڈ حکومت کے ہتھ کنڈے عوام کو احتجاج میں شرکت کے لیے روک نہیں سکتے۔

آفتاب صدیقی کا کہنا تھا کہ ہمارے قافلوں کو لاٹھی چارج کیا جارہا ہے، پولیس پی ٹی آئی کے ٹائیگر اور ٹائیگریس کو روک کیوں رہی ہے؟

پی ٹی آئی رہنما آفتاب صدیقی کا مزید کہنا تھا کہ امپورٹڈ حکومت کو وارننگ دیتا ہوں ایسے ہتھ کنڈوں سے باز رہے۔

واضح رہے کہ پی ٹی آئی کے زیر اہتمام کراچی میں شاہراہ قائدین پر مہنگائی کے خلاف احتجاج کیا جا رہا ہے جبکہ لاہور میں لبرٹی چوک اور فیصل آباد میں گھنٹہ گھر چوک پر اور پی ٹی آئی کے زیر اہتمام ملتان میں چوک شاہ عبداللہ جبکہ پشاورمیں ہشت نگری میں احتجاج کیا جارہا ہے۔