حلیم عادل شیخ نے کہا ہے کہ پیپلز پارٹی کو سیاسی دفن کرنے کا آغاز ہوچکا ہے۔

 اپوزیشن لیڈر سندھ اسمبلی حلیم عادل شیخ نے بلاول زرداری کے بیان پر رد عمل دیتے ہوئے کہا ہے کہ پرچی چیئرمین بیان دینے سے قبل اپنے غلاموں سے معلومات لے لیا کریں۔

انہوں نے کہا کہ پرچی چیئرمین بیان دینے سے قبل ایک پرچی ہی پکڑ لیتے، بلدیاتی الیکشن میں پیپلزپارٹی کی سیاہ کاریاں میں نے سندھ اسمبلی میں سامنے رکھیں، سندھ اسمبلی کے فلور پر بلدیاتی الیکشن میں پیپلزپارٹی گردی سے غلامان زرداری واقف ہیں۔

حلیم عادل شیخ نے کہا ہے کہ بلاول کے غنڈوں نے ٹنڈوآدم میں پی ٹی آئی کے ورکر کو شہید کیا، الیکشن کمیشن، آر اوز، پولیس، وڈیرے، بلاول زرداری کے غنڈے بن کر الیکشن میں اترے تھے۔

    اپوزیشن لیڈر سندھ اسمبلی نے کہا کہ جن کو حکومت لاشوں پر ملتی ہے وہ اب سندھ کے لوگوں کی لاشیں گرارہے ہیں، بلاول زرداری اور ان کی فاشسٹ جماعت کا سندھ کے دلیر عوام نے بھرپور مقابلہ کیا۔

انہوں نے کہا کہ پوری سندھ حکومت کے خلاف سندھ کے بہادر بیٹے بیٹیاں ڈٹ کر کھڑے رہے، بلاول کے غلامان اپنے گھروں کی پولنگ بھی ہارگئے، پرچی چیئرمین جب بولیں تو تربیت اور تقریر کا بھی خیال رکھیں۔

  حلیم عادل شیخ نے کہا ہے کہ سندھ کے عوام نے شروعات کی ہے، پیپلز پارٹی کو سیاسی دفن کرنے کا آغاز ہوچکا ہے۔

 واضح رہے کہ وفاقی وزیر خارجہ بلاول بھٹو نے قومی اسمبلی میں اظہار خیال کرتے ہوئے کہا تھا کہ لاڑکانہ سے الیکشن جیتیں تو ہم پردھاندلی کا الزام لگایا جاتا ہے، دھاندلی میں ہمارا کوئی بندہ ملوث ہوا تو میں خود اسے پکڑوں گا۔

انہوں نے کہا تھا کہ الزامات لگائیں گے تو اصل دھاندلی پر بھی کوئی نہیں بولے گا، سندھ بلدیاتی الیکشن سے بھاگنے کی کوشش کی جا رہی تھی، بلدیاتی الیکشن سے بھاگنے والوں کوعوام کیوں ووٹ دے گی؟

بلاول بھٹو نے کہا تھا کہ بلدیاتی انتخابات میں ادارےغیرسیاسی رہے، اداروں نے مداخلت نہ کی تو پیپلزپارٹی کی جیت ہوگی، مناسب ہوتا بلدیاتی الیکشن سندھ  کا معاملہ صوبائی اسمبلی میں اٹھاتے۔

وفاقی وزیر خارجہ نے کہا تھا کہ خان صاحب کو معلوم ہے ادارے نیوٹرل ہوئے توانکی ضمانت ضبط ہو جائے گی، سندھ میں ایسی کٹھ پتلیاں ہیں جنہیں آمرانہ دورمیں کھڑا کیا جاتا ہے۔

انہوں نے کہا تھا کہ خان صاحب کی شکایت ہے اداروں کو نیوٹرل نہیں ہونا چاہیے، صاف شفاف الیکشن کرانے کی تحریک ہم نے شروع کی تھی، عمران خان صاف و شفاف الیکشن سے نہیں جیت سکتے۔

بلاول بھٹو نے کہا تھا کہ عمران خان اداروں کو ٹائیگر فورس بن کر کام کرنے کی تحریک چلا رہے ہیں، دھاندلی ہمیشہ پیپلزپارٹی کوروکنے کیلئے کی گئی، دھاندلی کے باوجود پیپلزپارٹی کو حکومت کا موقع ملا۔