ایئرپورٹس سیکورٹی فورس ( اے ایس ایف ) نے کارروائی کرتے ہوئے ابوظہبی اور بحرین جانے والے مسافروں سے منشیات برآمدکرلی ہے۔

تفصیلات کے مطابق ایئرپورٹس سیکورٹی فورس نے اسلام آباد اور لاہور ایئر پورٹس پر کارروائی کو یقینی بناتے ہوئے 1.8 کلو گرام حشیش،   0.950 کلو گرام آئس ہیروئن برآمد کرلی ہے۔

ترجمان اے ایس ایف کا کہنا تھا کہ اسلام آباد سے ابوظہبی جانے والے مسافر محمد عدنان خان سے 1.8 کلو گرام حشیش برآمد کی گئی جبکہ لاہور ایئرپورٹ سے بحرین جانے والے مسافر عبدالرحمن سے 0.950 کلو گرام آئس ہیروئن برآمد کی گئی ہے۔

ترجمان اے ایس ایفکے مطابق مسافروں نے منشیات اپنے بیگ کی تہہ میں انتہائی مہارت سے چھپا رکھی تھی تاہم عملے نے سامان کی تلاشی کے دوران منشیات برآمد کر کے سمگلنگ کی کوششں ناکام بنا دی۔

ترجمان نے بتایا کہ ملزمان کو ابتدائی تفتیش کے بعدبرآمد شدہ منشیات سمیت مزید قانونی کارروائی کے لئے اے این ایف حکام کے حوالے کر دیا گیا ہے۔

خیال رہے کہ سیکیورٹی اداروں نے ملک بھرکے ایئرپورٹس پردہشت گردی اورکسی ممکنہ حملے کا الرٹ جاری کردیا گیا ہے۔

اے ایس ایف نے ملک بھرکے ہوائی اڈوں پرتعینات چیف سیکیورٹی آفیسرزکوالرٹ رہنے کی ہدایات جاری کردی ہیں۔ جب کہ تمام ایئرپورٹس اور اے ایس ایف کے دفاترپربھی سیکیورٹی سخت کردی گئی ہے۔

الرٹ میں کہا گیا ہے کہ ممکنہ طورپر کوئی خاتون خود کش بمبار حملہ کرسکتی ہے۔