ویسٹ انڈیز اور نیدر لینڈز کے درمیان ون ڈے سیریز کے دوسرے میچ میں ویسٹ انڈیز نے نیدرلینڈز کو با آسانی 5 وکٹوں سے شکست دے دی ہے۔

تفصیلات کے مطابق سیریز کے دوسرے میچ نیدرلینڈز کے وی آر اے گراؤنڈ میں کھیلے گئے اس میچ میں میزبان ٹیم نے ٹاس جیت کر پہلے بیٹنگ کا فیصلہ کیا۔

نیدرلینڈز کی ٹیم 49 ویں اوور میں 214 رنز بنا کر آل آؤٹ ہوگئی۔

نیدرلینڈز کی جانب سے وکٹ کیپر بلے باز  اسکوٹ ایڈورڈس نے 68 رنز کی اننگ کھیلی،میکس و ڈوڈ 51،وکرامجت سنگھ 46 جبکہ کپتان پیٹر سیلر صرف 5 رنز بنا سکے۔

ویسٹ انڈیز کی جانب سے اکیل حسین نے شاندار بولنگ کا مظاہرہ کرتے ہوئے 4 بلے بازوں کو پویلین کی راہ دکھائی،الزرئی جوسیف 2 جبکہ اینڈرسن فلپ،ہیڈن والش اور نکروماہ بونر نے 1،1 وکٹ حاصل کی۔

نیدرلینڈز کی جانب سے دیا گیا ہدف ویسٹ انڈیز نے 46 ویں اوور میں 5 وکٹوں کے نقصان پر با آسانی حاصل کر لیا۔

ویسٹ انڈیز کی جانب سے  برینڈن کنگ نے ناقابل شکست 91 رنز کی شاندار اننگ کھیلی،کیچی کارٹے 43 رنز بنا کر ناقابل شکست رہے،کیل میئرس 22،نکروماہ بونر 15،شائی ہوپ 18 جبکہ کپتان نکولس پورن نے 10 رنز بنائے۔

نیدر لینڈز کی جانب سے بس ڈی لیڈی نے 2 وکٹیں حاصل کیں جبکہ لوگن ون بیک،اریان ڈٹ اور شارز احمد نے 1،1 شکار کیا۔

ویسٹ انڈیز کے برینڈن کنگ کو 91 رنز کی ناقابل شکست اننگ کھیلنے پر مین آف دی میچ کا ایوارڈ دیا گیا۔