عاطف خان نے کہا ہے کہ گندم اور آٹے پر سیاست نہیں کرنی چاہیے۔

وزیرخوراک خیبرپختونخوا عاطف خان نے میڈیا سے گفتگو کرتے ہوئے کہا ہے کہ راشن کارڈ کے لئے 26 لاکھ روپے مختص کیے ہیں، انصاف فوڈ کارڈ کی تیاری کا عمل جاری ہے۔

انہوں نے کہا کہ ہمیں فائن آٹا کھانے کی عادت پڑ گئی ہے، برآمد کی گئی گندم اور مقامی گندم کو ملاکر آٹا بنایا جاتا تھا، اسی وجہ سے رنگ سرخ تھا، اب کوشش کریں گے کہ پنجاب اور پاسکو سے گندم خریدیں۔

   عاطف خان نے کہا ہے کہ پنجاب اور مقامی گندم کو ملا کر پیسنے سے آٹے کے سرخ رنگ کا مسئلہ نہیں ہوگا، گندم اور آٹے پر سیاست نہیں کرنی چاہیے، گندم اور آٹے کی ترسیل پر پابندی نہیں ہونی چاہیے۔

 وزیرخوراک خیبرپختونخوا نے کہا ہے کہ درآمد کی گئی گندم اور مقامی گندم کو ملاکر آٹا بنایا جاتاتھا، اسی وجہ سے رنگ سرخ تھا، صوبے میں 32 ڈیم بنائے گئے ہیں جن سے زمینیں سیراب ہوں گی۔

انہوں نے کہا کہ ہم کوشش کریں گے کہ گندم کی پیداوار بڑھائیں اور پنجاب اور باہر سے گندم درآمد نہ کی جائے، جب تک گندم اور آٹے کی ترسیل پر پابندی ختم نہیں ہوگی، تب تک آٹے کے ریٹ کا مسئلہ ختم نہیں ہوگا۔

    عاطف خان نے کہا ہے کہ ماضی میں بھی مسلم لیگ ن کی حکومت نے آٹے کی ترسیل پر پابندی عائد کی تھی، اگر ملک کو چلانا ہے تو پھر ایک دوسرے کے ساتھ تعاون ضروری ہے۔