سردار تنویر الیاس نے کہا ہے کہ حکومت انسانی حقوق کی خلاف ورزیوں کے خلاف ہر فورم پر آواز بلند کیے ہوئے ہے۔

وزیر اعظم آزاد کشمیر سردار تنویر الیاس نے کہا ہے کہ انسانی حقوق کے رہنما احسن کو ضمانت ملنے کے باوجود  سینٹرل جیل سری نگر کے باہر سے دوبارہ گرفتار کرنا انسانی حقوق کی سنگین خلاف ورزی ہے۔

انہوں نے کہا کہ احسن کو کالے قوانین کی بھینٹ چڑھایا جا رہا ہے، پی ایس اے لگا کر انسانی حقوق کے کارکن کو کوٹ بھلوال جیل جموں منتقلی کی شدید مذمت کرتے ہیں۔

سردار تنویر الیاس نے کہا ہے کہ اقوام متحدہ، ایمنسٹی انٹرنیشنل، ایشیا واچ اور انسانی حقوق کے دیگر ادارے نوٹس لیں، حکومت آزاد کشمیر مقبوضہ کشمیر میں انسانی حقوق کی خلاف ورزیوں کے خلاف ہر فورم پر آواز بلند کیے ہوئے ہے۔

وزیر اعظم آزاد کشمیر سردار تنویر الیاس نے کہا ہے کہ صدر ریاست بیرسٹر سلطان محمود چوہدری کا حالیہ دورہ یورپ بھارتی مظالم کو بے نقاب کرنے میں انتہائی اہمیت کا حامل رہا۔

دوسری جانب کشمیر میڈیا سروس کے مطابق بھارت کے غیر قانونی زیر قبضہ جموں وکشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران ضلع کولگام میں دو کشمیری نوجوانوں کو شہید کر دیا۔

بھارتی فوجیوں اور پیرا ملٹری اہلکاروں نے نوجوانوں کو ضلع کولگام کے علاقے تربجی میں محاصرے اور تلاشی کی کارروائی کے دوران شہید کیا۔

واضح رہے کہ بھارت کی قابض فوج نے پُرتشدد کارروائیوں میں اس ماہ میں  32 کشمیری نوجوان کو شہید کیا جبکہ 92 افراد قابض بھارتی فوجی کی حراست میں ہے۔