ملک کے بیشتر علاقوں میں موسم گرم اور خشک رہنے کا امکان ہے جبکہ جنوبی پنجاب اور بالائی سندھ میں شدید گرم رہنے کا امکان ہے۔

 محکمہ موسمیات کے مطابق آئندہ بارہ گھنٹوں کے دوران ملک کے بیشتر علاقوں میں موسم زیادہ تر گرم اور خشک جبکہ جنوبی پنجاب اور بالائی سندھ میں شدید گرم رہنے کا امکان ہے۔

محکمہ موسمیات نے بتایا کہ اسلام آباد میں دن میں موسم گرم رہے گا جبکہ بعد از دوپہر گرد آلود ہوائیں چلنے کا امکان ہے جس دوران زیادہ سے زیادہ درجہ حرارت 41 ڈگری سینٹی گریڈ تک ریکارڈ کیا جاسکتا ہے۔

بلوچستان کے بیشتر اضلاع میں موسم شدید گرم اور خشک رہے گا جبکہ بعداز دوپہر گردآلود تیز ہوائیں چلنے کا مکان ہے۔

محکمہ موسمیات کا کہنا ہے کہ گلگت بلتستان اور بالائی خیبرپختونخوا میں چند مقامات پر تیز ہواوٴں/آندھی اور گرج چمک کے ساتھ بارش کا امکان ہے، اس دوران پوٹھوہار کے علاقے میں گرد آلود ہوائیں چلنے کا امکان ہے۔

واضح رہے کہ ملک بھر میں شدید گرمی کی ایک اور لہر کا الرٹ جاری کردیا گیا ہے۔

اس حوالے سے محکمہ موسمیات کا کہنا تھا کہ آئندہ ہفتے ملک کے بیشتر علاقے شدید گرمی کی لپیٹ میں رہیں گے۔

محکمہ موسمیات کی جانب سے  5 سے 9 جون تک ملک کے مختلف علاقوں میں شدید گرمی کی لہر کی پیشگوئی کی گئی ہے۔

اس حوالے سے الرٹ بھی جاری کردیا گیا ہے جس میں بتایا گیا ہے کہ جنوبی پنجاب سمیت مشرقی بلوچستان، سندھ کے وسطی اور شمالی علاقے آئندہ 4 سے 5 روز تک شدید گرمی کی لپیٹ میں رہیں گے۔

محکمہ موسمیات کے مطابق اس لہر کے دوران سندھ میں درجہ حرارت 45 ڈگری سے زائد ریکارڈ کیے جانے کا امکان ہے۔