پاکستان  کرکٹ ٹیم اور کاؤنٹی چیمپئین شپ میں گلوسٹر شائر کی نمائندگی کرنے والے فاسٹ بولر نسیم شاہ نے کہا ہے کہ جب میں انگلینڈ  آیا تو مجھے رہائش دی گئی جس سے میری ذمہ داریاں بھی بڑھ گئیں۔

انہوں نے کہا کہ چونکہ میں اکیلا رہ رہا تھا اس لیے مجھے گھر کے کام بھی کرنے پڑے،مجھے اپنے گھر کو صاف ستھرا رکھنے، ناشتہ اور رات کا کھانا بنانے، اپنی کٹ تیار کرنے اور خود گراؤنڈ جانا سیکھاہے۔

فاسٹ بولر نے کہا کہ جیسا کہ مجھے انگلینڈ میں طویل عرصے تک رہنے کا موقع ملا اس لیے میں نےپچز اور کھیل کے حالات کے بارے میں مزید معلومات حاصل کی ہیں۔

نسیم  شاہ نے 2019 میں آسٹریلیا کے دورے پر پاکستان کے لیے ٹیسٹ ڈیبیو کیا تھا، اور اب تک، وہ 11 ٹیسٹ کھیل چکے ہیں لیکن ابھی تک اپنے ملک کے لیے دیگر دو فارمیٹس میں ڈیبیو نہیں کر سکے ہیں۔

انہوں نے کہا کہ میں سخت محنت کر رہا ہوں اور جو کر سکتا ہوں کر رہا ہوں، جب بھی میرے ہاتھ میں گیند ہوتی ہے تو میں صرف ایک ہی چیز کی کوشش کرتا ہوں کہ اچھی کارکردگی کا مظاہرہ کرنا چاہے فارمیٹ کوئی بھی ہو۔

انہوں نے کاؤنٹی کرکٹ کے معیار کی بھی تعریف کی اور اس کو انتہائی پیشہ ورانہ قرار دیا۔

نسیم شاہ نے کہا کہ میں نے مجھ سے پہلے یہاں کھیلنے والے سینئر کھلاڑیوں سے کاؤنٹی کرکٹ کے معیار اور ساخت کے بارے میں بہت کچھ سنا ہے۔

نسیم شاہ نے مزید کہا کہ یہاں آنے کے بعد میں نے خود اعلیٰ معیار اور پیشہ ورانہ سیٹ اپ کا تجربہ کیا ہے، میں نے یہاں کرکٹ کھیل کر خوب لطف اٹھایا ہے۔