پنجاب کے 20 حلقوں میں ضمنی انتخابات کے معاملے پر صوبائی وزیر داخلہ عطاء اللہ تارڑ کو الیکشن کمپین میں جانا مہنگا پڑگیا۔

الیکشن کمیشن کی جانب سے جاری کردہ نوٹیفیکیشن کے مطابق صوبائی الیکشن کمیشن نے ضابطہ اخلاق کی خلاف ورزی پر عطاء اللہ تارڑ کو نوٹس جاری کردیا ہے۔

نوٹیفیکیشن کے مطابق صوبائی وزیرعطاء اللہ تارڑ نے جھنگ کے دو حلقوں میں انتخابی مہم میں حصہ لیا،عطاء اللہ تارڑ نے ستائیس اور اٹھائیس جون کو دونوں حلقوں میں انتخابی مہم چلائی۔

 نوٹیفیکیشن میں کہا گیا ہے کہ الیکشن کمیشن قوانین کے مطابق کوئی بھی پبلک آفس ہولڈر انتخابی مہم میں حصہ نہیں لے سکتا، عطاء اللہ تارڑ نے انتخابی مہم میں حصہ لے کر الیکشن کمیشن کے ضابطہ اخلاق کی خلاف ورزی کی ہے۔

نوٹیفیکیشن میں یہ بھی کہا گیا ہے کہ الیکشن کمیشن نے عطاء اللہ تارڑ کو وضاحت کے لیے یکم جولائی کو طلب کرلیا، صوبائی وزیر ذاتی حیثیت میں یا اپنے نمائندے کے ذریعے الیکشن کمیشن کے روبرو اپنا موقف پیش کریں۔

نوٹیفیکیشن میں مزید کہا گیا ہے کہ عطاء اللہ تارڑ کو الیکشن کمیشن کے سامنے پیش ہونے کے لیے بروز جمعہ دوپہر دو بجے تک کا وقت دیا گیا ہے، مقررہ وقت تک اگر صوبائی وزیر داخلہ عطاء اللہ تارڑ الیکشن کمیشن کے روبرو پیش نہ ہوئے تو آئین کے مطابق قانونی کارروائی کی جائے گے۔