خیبر پختونخواہ حکومت کی جانب سے پیٹرول مراعات میں کٹوتی کے بعد دیگر سرکاری اخراجات میں بھی کمی کا فیصلہ کرلیا گیا ہے۔

 اس حوالے سے وزیراعلیٰ کے پی کی جانب سے گاڑیوں کی دیکھ بال و مرمت، ٹی اے/ڈی اے اور دیگر سرکاری اخراجات میں کمی کے لئے اضافی گائیڈ لائنز  منظور کرلیں گئیں ہیں۔

وزیراعلیٰ محمود خان کی منظوری کے بعد تمام محکموں کے لئے اضافی گائیڈ لائنز جاری کرتے ہوئے فوری عملدرآمد کے لئے چیف سیکرٹری کو باقاعدہ مراسلہ بھی ارسال کردیا ہے۔

گائیڈ لائنز کے مطابق صوبائی سطح کے تمام اجلاسوں جن میں کمشنرز،  ڈپٹی کمشنرز،  آر پی اوز اور ڈی پی اوز کی شرکت ضروری ہو، کو ویڈیو لنک کے ذریعے منعقد کیا جائے گا۔

ڈویژنل سطح کے تمام اجلاسوں جن میں ڈپٹی کمشنرز اور ڈی پی اوز کی شرکت ضروری ہو، کو بھی ویڈیو لنک کے ذریعے منعقد کیا جائے گا۔

اسی طرح محکمانہ اجلاسوں میں متعلقہ ضلعی محکموں کے سربراہان ویڈیو لنک کے ذریعے شریک ہونگے۔

آپریشنل ڈیوٹیز، ایمبولینس سروس، فیلڈ انسپکشنز، کورٹ کیسز اور دیگر ضروری معاملات پر اضافی گائیڈ لائنز کا اطلاق نہیں ہوگا۔

یہ اضافی گائیڈ لائنز صوبائی حکومت کی پہلے سے جاری کفایت شعاری پالیسی کے تحت جاری کئے گئے ہیں۔

وزیر اعلیٰ محمود خان کے احکامات کی روشنی میں صوبائی حکومت کفایت شعاری پالیسی کے تحت سرکاری اخراجات میں کمی کے لئے متعدد اقدامات اٹھا رہی ہے۔

ان اضافی گائیڈ لائنز پر عملدرآمد کے نتیجے میں پی او ایل اخراجات  کے ساتھ دیگر اخراجات کو بھی خاطر خواہ حد تک کم کیا جا سکے گا۔

ویڈیو لنک کے ذریعے اجلاسوں میں شرکت سے ڈویژنل اور ضلعی انتظامیہ افسران کی ہمہ وقت فیلڈز میں حاضری بھی یقینی ہوگی۔

خیال رہے کہ وزیراعلیٰ کے پی کی جانب سے تمام سرکاری محکمے اور خودمختار ادارے صوبائی حکومت کی کفایت شعاری پالیسی پر سختی سے عملدرآمد کو یقینی بنانے کی ہدایت کی گئی ہے۔