مرتضیٰ وہاب نے کہا ہے کہ ڈاکٹر سکندر میندھرو انتہائی ملنسار شخصیت کے مالک تھے۔

 ایڈمنسٹریٹر کراچی مرتضیٰ وہاب نے ڈاکٹر سکندر میندھرو کے انتقال پر اظہار افسوس و تعزیت کیا ہے۔

مرتضیٰ وہاب نے پی پی رہنما سکندر میندھرو مرحوم کی مغفرت و بلند درجات اور پسماندگان کے لئے صبر جمیل کی دعا کی۔

انہوں نے کہا کہ ڈاکٹر سکندر میندھرو کی پارٹی کے لئے خدمات کو ہمیشہ یاد رکھا جائیگا، ڈاکٹر سکندر میندھرو انتہائی ملنسار شخصیت کے مالک تھے۔

مرتضیٰ وہاب نے کہا کہ اللہ تعالیٰ مرحوم کی آخرت کے تمام منازل آسان کرے۔ آمین

پی پی رہنما ڈاکٹر سکندر میندھرو انتقال کرگئے

ڈاکٹر سکندر میندھرو کینسر کے مرض میں مبتلا تھے تاہم پارٹی رہنما اور صوبائی وزیر نے ڈاکٹر سکندر میندھرو کے انتقال کی تصدیق کردی ہے۔

اس حوالے سے صوبائی وزیر اسماعیل راہو کا کہنا ہے کہ ڈاکٹر سکندر میندھرو کی طبیعت کئی ماہ سے خراب تھی۔

انہوں نے بتایا ہے کہ ڈاکٹر سکندر میندھرو نے آغا خان سے کینسر کا علاج کرایا لیکن طبیعت بہتر نہ ہونے پر امریکا منتقل کیا گیا تھا۔

اہل خانہ کے مطابق، ان کی لاش کو تین دن بعد پاکستان واپس لایا جائے گا۔

بدین ضلع میں پیدا ہونے والے 78 سالہ سکندر علی میندھرو پی پی پی کے سینئر رہنما، سابق صوبائی وزیر اور مارچ 2018 سے سینیٹر تھے۔

وہ 1993 سے 1996، 1997 سے 1999، 2002 سے 2008 اور 2008 سے 2013 تک متعدد بار رکن صوبائی اسمبلی (ایم پی اے) سندھ رہے۔

وزیر اعلیٰ سندھ سید مراد علی شاہ، سینیٹر شبلی فراز اور دیگر سیاسی رہنماؤں نے پیپلز پارٹی کے سینیٹر ڈاکٹر سکندر کے انتقال پر گہرے دکھ اور افسوس کا اظہار کیا ہے۔