چیف الیکشن کمشنر سکندر سلطان راجہ نے کہا ہے کہ الیکشن کمیشن انتخابات کے لئے ہمیشہ تیار ہے، نئے انتخابات کا فیصلہ حکومت نے کرنا ہے۔

چیف الیکشن کمشنر سکندر سلطان راجہ نے صحافیوں سے غیر رسمی گفتگو کرتے ہوئے کہا کہ الیکشن کمیشن اپنے فیصلے بلا خوف کرتا ہے اور کرتا رہے گا۔

انہوں نے کہا کہ فیصلوں سے کوئی ناراض یا راضی ہوتا ہے یہ انکا مسئلہ ہے، الیکشن کمیشن آئین اور قانون کے مطابق فیصلے کرتا ہے۔

ان کا کہنا تھا کہ الیکشن کمیشن کا کام صاف شفاف اور غیر جانبدار انتخابات کا انعقاد ہے۔

انہوں نے بتایا کہ نئے انتخابات کے لئے حلقہ بندیوں پر تیزی سے کام جاری ہے تاہم مردم شماری سرکاری طور پر شائع ہونے سے قبل حلقہ بندیاں نہیں کی جاسکتیں ہیں۔

چیف الیکشن کمشنر نے کہا کہ مئی 2021 میں 2017 کی مردم شماری کے نتائج شائع ہوئے اور نئی حلقہ بندیوں پر کام مردم شماری کے نتائج شائع ہونے کے بعد شروع کیا جبکہ 2018 کے انتخابات اور حلقہ بندیوں کے حوالے سے خصوصی آئینی ترمیم لائی گئی تھی۔

انہوں نے بتایا کہ حکومت ڈیجیٹل مردم شماری کرانا چاہتی ہے، ڈیجیٹل مردم شماری کے نتائج دسمبر 2022 تک ملے تو بروقت حلقہ بندیاں ہوسکتی ہیں تاہم نتائج تاخیر کا شکار ہوئے تو 2017 کی مردم شماری کی بنیاد پر حلقہ بندیوں پر انتخاب کیا جائیگا۔