حضرت عبداللہ شاہ غازیؒ کا مزار بلاشبہ شہرقائد کی قدیم ترین نشانیوں میں سے ایک ہے، کراچی کے پوش علاقے کلفٹن کے ساحل پر واقع اس مزار پر روزانہ ملک بھر سے عقیدت مندوں کی بڑی تعداد حاضری دینے کے لیے آتی ہے۔

سید عبداللہ شاہ غازیؒ سندھ میں آنے والے وہ پہلے سادات بزرگ تھے، جنہوں نے اسلامی بیج بویا اور پھر اس کی آبیاری کی اور محبت، اخوت اور بردباری سے دلوں کو گرمایا اور اس خطے کو ایمان کی ذرخیزی سے روشناس کیا۔

ان کا سب سے بڑا کارنامہ سندھ میں دین اسلام کی آبیاری کرنا ہے کیونکہ اگر وہ نہ آتے تو شاید سندھ میں اسلام بھی دیر سے پہنچتا۔

حال ہی میں پاکستان کی  دو مشہور شخصیات نے عبدﷲ شاہ غازی کے مزار پر دفن ہونے کی خواہش کا اظہار کیا لیکن آپ کو بتاتے چلیں کہ ان کے علاوہ بھی چند شخصیات اس مزار کے احاطے میں دفن ہیں۔

مزار کے احاطے میں دفن مشہور شخصیات

 ڈاکٹر عامر لیاقت

پاکستان کے نامور سیاست دان اور میزبان ڈاکٹر عامر لیاقت کی اچانک موت نے سب ہی کو دکھی کر دیا مگر ان کے حوالے سے جہاں بہت سارے تنازعات سامنے آئے وہیں کچھ اچھی باتیں بھی سامنے آئيں۔

ان کی تدفین ان کی وصیت کے مطابق عبداللہ شاہ غازی کے مزار کے احاطے میں کی گئی ہے۔

 امید ہے کہ اس وصیت کے پیش نظر یہی خیال ہو گا کہ جو بھی پیر عبداللہ شاہ غازی کے مزار پر دعا کرنے آئے گا وہ یقیناً ان کی مغفرت کے لیے بھی دعا کرے گا۔

  عمر شریف

گزشتہ سال اکتوبر میں کامیڈی کے بے تاج بادشاہ عمر شریف کے انتقال پر جہاں دنیا بھر میں ان کے مداح افسردہ ہوئے وہیں سندھ حکومت نے عمر شریف کی تدفین ان کی خواہش کے مطابق عبداللہ شاہ غازی کے مزار کے احاطے میں کرائی۔

 شاہ احمد نورانی

جمعیت علما اسلام کے سربراہ شاہ احمد نورانی کا شمار ان جید علما میں ہوتا ہے جنہوں نے ساری عمر حضور اکرم صلی اللہ علیہ وسلم کے عاشق رسول کے طور پر گزاری یہی سبب ہے کہ عبد اللہ شاہ غازی جو کہ آل رسول میں سے ان کی مزار کے احاطے میں دفن ہونے کی خواہش کا اظہار کیا جس کو ان کے چاہنے والوں نے پورا کیا۔

 شیریں جناح

قائد اعظم محمد علی جناح بانی پاکستان کی ایک بہن فاطمہ جناح کو ان کے اپنے مزار کے احاطے میں ہی دفن کیا گیا تھا جب کہ ان کی ایک دوسری بہن شیریں جناح بھی عبداللہ شاہ غازی کے مزار میں دفن ہیں۔

 خورشید احمد

معروف نعت خواں خورشید احمد کا شمار پاکستان کے ان مشہور ترین نعت خوانوں میں ہوتا ہے جنہوں نے ساری عمر مدحت رسول میں گزاری اور اسی نسبت سے عبداللہ شاہ غازی کے مزار پر دفن ہونے کی خواہش کا اظہار کیا۔

اس کے علاوہ عبدﷲ شاہ غازی کے مزار کے احاطے میں مرحوم عامر لیاقت حسین کی والدہ محترمہ سلطانہ محمود اور والدِ گرامی شیخ لیاقت، معروف سیاسی شخصت رہنما پاکستان پیپلز پارٹی سینیٹر تاج حیدر کے والد سابق وائس چانسلر بلوچستان یونیورسٹی پروفیسر کرار حسین کی قبریں بھی موجود ہیں۔

ویڈیو دیکھیں: