چیئرمین ایف بی آر نے کہا ہے کہ  ایک لاکھ جس کی تنخواہ ہے اس کو ٹیکس چھوٹ ہوگی۔

   تفصیلات کے مطابق چیئرمین ایف بی آر عاصم احمد نے کہا ہے کہ 10 فیصد ریگولیٹری ڈیوٹی پیٹرول پر عائد کی گئی ہے، اس اقدام سے 30 ارب روپے ایک سال میں ریونیو حاصل کیا جائے گا۔

انہوں نے کہا کہ مقامی طور پر تیار ہونے والے سگریٹس پر ایف ای ڈی عائد کرنے کی تجویز ہے جس سے 10 ارب روپے کا سالانہ ریونیو حاصل ہوگا۔

عاصم احمد نے کہا ہے کہ ایک لاکھ جس کی تنخواہ ہے اس کو ٹیکس چھوٹ ہوگی، 6 سے 12 لاکھ تک انکم والوں پر 100 روپے کا ٹیکس جو رکھا گیا ہے وہ پروسیسنگ فیس ہے۔

چیئرمین ایف بی آر نے کہا ہے کہ غیر ضروری ودہولڈنگ ٹیکسز کو ختم کیا گیا، آڈٹ چار سال میں ایک دفعہ ہوگا، بہبود سرٹیفکیٹ پر ٹیکس کی شرح کو 10 فیصد سے کم کرکے 5 فیصد کرنے کی تجویز ہے۔

انہوں نے کہا کہ آئی ٹی کی برآمدات پر ٹیکس 1 فیصد سے کم کرکے 0.25 فیصدکرنے کی تجویز ہے، اوپن پلاٹس جس میں سرمایہ کاری ہوئی ایف بی آر ویلیو کے مطابق 1 فیصد ہے۔

عاصم احمد نے کہا ہے کہ ایک پلاٹ پر ٹیکس چھوٹ دی جائے گی، غیر استعمال شدہ رہائشی، کمرشل، انڈسٹریل پلاٹ اور فارم ہاؤسز پر ٹیکس ہوگا، کیپٹل گین ٹیکس کی مدت میں توسیع کی گئی ہے، مدت میں چار سال سے 6 سال کی توسیع کی گئی ہے۔

 چیئرمین ایف بی آر نے کہا ہے کہ پہلے سال کیپیٹل گین ٹیکس 15 فیصد دوسرے سال 12.5 فیصد ٹیکس ہوگا، نان فائلر پر پراپرٹی کی خریدوفروخت پر ٹیکس کو 2 فیصد سے پانچ فیصد کیا گیا ہے۔

انہوں نے کہا کہ مجموعی طور پر 440 ارب روپے کے نئے ٹیکسز عائد کئے گئے ہیں، کسمٹز ڈیوٹی کی مد میں 34 ارب اور سیلز ٹیکس 90 ارب کے نئے ٹیکس اقدامات کی تجویز ہے۔

عاصم احمد نے کہا ہے کہ انکم ٹیکس میں 316 ارب کے نئے ٹیکس اقدامات کئے گئے ہیں، عوام کو 85 ارب روپے کا ٹیکس ریلیف فراہم کرنے کی تجویز ہے، کسمٹز کی مد 6 ارب، سیلز ٹیکس 30 ارب کا ریلیف دینے کی تجویز ہے۔

چیئرمین ایف بی آر نے کہا ہے کہ انکم ٹیکس کی مد میں 49 ارب روپے کا ٹیکس ریلیف فراہم کرنے کی تجویز ہے، مجموعی طور پر 85 ارب کے ریلیف سے ٹیکس اقدامات کا حجم 355 ارب تجویز کیا گیا ہے۔