وزیر مملکت برائے امور خارجہ حنا ربانی کھر نے کہا ہے کہ فیٹف اجلاس میں پیش رفت اختتام نہیں آغاز ہے جس کے لئے ہم اپنی کوششیں جاری رکھیں گے۔

وزیر مملکت برائے امور خارجہ حنا ربانی کھر نے سیکرٹری خارجہ سہیل محمود اور خواجہ عدنان ظہیر ڈی جی ایف اے ٹی ایف کے ہمراہ ایف اے ٹی ایف کے حوالے سے پریس کانفرنس کی۔

پریس کانفرنس سے خطاب کرتے ہوئے حنا ربانی کھر نے کہا کہ انہوں نے ایف اے ٹی ایف پلینری کے برلن اجلاس میں شرکت کی جس میں پاکستان کی 2018 اور 2021 کے ایکشن پلان اور سنہری عملدرآمد کا جائزہ لیا گیا۔

یہ بھی پڑھیں؛ ایف اے ٹی ایف کی پاکستان کو گرے لسٹ سے نکالنے کی مشروط رضامندی! 

انہوں نے کہا کہ ایف اے ٹی ایف نے بھی پاکستان کی کارکردگی کو سراہا ہے اور اپنی تکنیکی ٹیم کو پاکستان کے آن سائٹ وزٹ کی اجازت دے دی ہے ،  جب کسی ملک کو گرے لسٹ سے نکالا جاتا ہے تو اس تکنیکی ٹیم کو وزٹ کی اجازت دی جاتی ہے اور امید ہے جلد پاکستان گرے لسٹ سے باہر کو گا۔

وزیر مملکت برائے خارجہ امور کا کہنا تھا کہ پاکستان نے دہشتگرد کارروائیوں میں مالی معاونت کو روکا اور مشکل وقت میں ہم نے ایک قوم بن کر کام کیا جب کہ  ہم جانتے ہیں گرے لسٹ سے نکلنا کتنا مشکل کام ہے لیکن ہمیں امید ہے پاکستان ہمیشہ کے لیے فیٹف کی گرے لسٹ سے نکل جائےگا۔

حنا ربانی کھر کا کہنا تھا کہ ہم کوشیش کر رہے ہیں کہ ایف اے ٹی ایف کی تکنیکی ٹیم اکتوبر سے قبل اپنا کام مکمل کر کہ رپورٹ جمع کرائے جب کہ  گرے لسٹ سے نکلنے کی خبرسے پاکستان کے معاشی حالات بہتر ہونگے اور کوشش ہوگی دوبارہ کبھی گرے لسٹ میں نہ جائے۔

وزیر مملکت نے بتایا کہ فیٹف قانون سازی کے معاملے پر طریقہ کارپرتحفظات تھے لیکن پارلیمانی کمیٹی میں اپوزیشن نے مل کر قانون سازی منظور کی  اور ہم نے ہمیشہ فیٹف کے غیرسیاسی رہنے کی بات کی جب کہ اس میں شک نہیں فیٹف کی شرائط مشکل تھیں لیکن فیٹف نے پاکستان کی شرائط پوری کرنے کی کوششوں کو تسلیم کیا  اور پاکستان کو کلیئر کردیا ہے۔

انہوں نے کہا کہ ہماری ٹیم نے بہت عمدہ کام کیا اور مشکل ترین اہداف حاصل کیے ، قومی اور صوبائی اداروں نے بھی اپنا کام بہترین انداز میں کیا ہے ،  ہم اب اپنی موجودہ پوزیشن جاری رکھنا چاہتے ہیں، ہماری یہ کوششیں دیگر ممالک کے لیے ایک رول ماڈل ہیں۔

وزیر مملکت نے مزید کہا کہ مشکل حالات میں ہم نے ایک قوم بن کر کام کیا اور پاکستان نےفیٹف کےمعاملات پرذمہ داری کامظاہرہ کیا۔ فیٹف کے معاملے پر جن کو کریڈٹ چاہیے ہم تمغے دینے کیلئے بھی تیار ہیں۔