شاہ محمود قریشی نے کہا ہے کہ حکومت چلانا امپورٹڈ حکمرانوں کے بس کی بات نہیں ہے۔

سابق وزیر خارجہ اور پی ٹی آئی کے رہنما شاہ محمود قریشی نے میڈیا سے گفتگو کرتے ہوئے کہا کہ اب ذاتیات اور شخصیات کا مقابلہ نہیں بلکہ نظریات کی جنگ ہے۔

انہوں نے کہا کہ ایک طرف عمران خان کا نظریہ اور دوسری طرف چوں چوں کا مربہ ہے، میں ہر حلقے میں عمران خان کے نظریہ کو لے کر جاؤں گا۔

شاہ محمود قریشی نے یہ بھی کہا کہ جہانگیر ترین، علیم خان اور حواریوں نے ہمیشہ لوٹوں کے بل بوتے پر سیاست کی، میں نے ہمیشہ کہا نوٹوں والے اور ووٹوں والے اور ہوتے ہیں۔

سابق وزیر خارجہ کا کہنا تھا کہ نوٹوں کے زور پر سیاست کرنے والے ن لیگ کے ٹکٹ پر الیکشن لڑ رہے ہیں اور ووٹوں کے زور پر سیاست کرنے والے عمران خان کے ساتھ ہیں۔

پی ٹی آئی کے رہنما نے حکومت پر تنقید کرتے ہوئے کہا کہ حکومت چلانا امپورٹڈ حکمرانوں کے بس کی بات نہیں ہے جبکہ ان جماعتوں کا نہ نظریہ ایک ہے اور نہ راستہ ایک ہے۔

شاہ محمود قریشی کا کہنا تھا کہ موجودہ حکومت 13 جماعتوں پر مشتمل چوں چوں کا مربہ ہے جبکہ حکومت کے پاس ملک چلانے کا نہ منصوبہ ہے اور نہ ہی ان میں اہلیت ہے۔

ان کا یہ بھی کہنا تھا کہ عمران خان کو اندرونی وبیرونی سازش کے تحت اقتدار سے الگ کیا گیا لیکن ہمیں معلوم ہے کہ عمران خان ہمت ہارنے والے نہیں ہیں۔

سابق وزیر خارجہ اور پی ٹی آئی کے رہنما شاہ محمود قریشی کا مزید کہنا تھا کہ اپوزیشن لیڈر پاکٹ اپوزیشن لیڈر ہے اور میں نے پہلی دفعہ میڈیا پر دیکھا کہ اپوزیشن لیڈر وزیر اعظم کی تقریر پر ڈیسک بجا رہا ہے۔