گورنر پنجاب نے کہا ہے کہ انشاءاللہ وطن عزیز کو بحران سے نکالیں گے۔

گورنر پنجاب محمد بلیغ الرحمان نے اپنے ایک بیان میں کہا کہ مسلم لیگ ن نے مشکل معاشی حالات کے باوجود متوازن بجٹ پیش کیا۔

انہوں نے کہا کہ چیلنجز کے باوجود ٹیکس فری بجٹ اور عام آدمی کو ریلیف دینا خوش آئند ہے۔

محمد بلیغ الرحمان کا کہنا تھا کہ متوازن بجٹ پیش کرنے پر وزیراعلی پنجاب اور کابینہ کو مبارکباد پیش کرتا ہوں، انشاءاللہ وطن عزیز کو بحران سے نکالیں گے۔

گورنر پنجاب محمد بلیغ الرحمان کا مزید کہنا تھا کہ مسلم لیگ (ن) کی حکومت نے ڈوبتی معیشت کا رخ موڑ کر ترقی کا سفر شروع کیا ہے۔

واضح رہے اس سے قبل وزیراعلیٰ پنجاب حمزہ شہباز کی زیر صدارت پارلیمانی پارٹی کا اجلاس ہوا تھا جس میں اتحادی جماعتوں کے ارکان کی کثیر تعداد نے شرکت کی۔

حمزہ شہباز نے کہا کہ 3 ماہ سے چند انا پرست لوگوں کے پیدا کردہ بحران سے گزر رہے ہیں، غیر یقینی صورتحال میں صوبے نہیں چل سکتے، 3 دن سے بجٹ نہیں پیش کرسکے۔

انہوں نے کہا کہ آئین اور قانون کے رکھوالوں کو غنڈوں کے حوالے نہیں کیا جاسکتا، وزیراعلیٰ کے انتخاب کے دوران وردی میں ملبوس افسروں کو ٹھڈے اور مکے مارے گئے، سب جانتے ہیں کہ ایوان میں غنڈے کس طرح ڈپٹی اسپیکر کی طرف لپکے تھے۔

وزیراعلیٰ پنجاب نے کہا کہ احتجاج کے دوران شہید پولیس اہلکار بیٹے کی سسکیاں دل چیر دیتی ہیں، چار سال سے ایک پائی کی کرپشن یا منی لانڈرنگ ثابت نہیں کرسکے، ضمانت کیس میں کرپشن کا ثبوت نہ ملنے پر ہوئی جس کا فیصلے میں بھی ذکر کیا گیا۔