سابق وزیربرائے توانائی عمرایوب نے مسلم لیگ ن کے رہنما شاہد خاقان عباسی کی پریس کانفرنس پرسخت ردعمل دیتے ہوئے کہا ہے کہ امپورٹڈ حکومت کو اپنے گریبان میں جھانک کردیکھنا چاہیئے۔

رہنما پی ٹی آئی اورسابق وزیرتوانائی عمرایوب کا کہنا تھا کہ آج شاہد خاقان عباسی نے پریس کانفرنس میں پی ٹی آئی حکومت اورہماری توانائی پالیسی پر تنقید کی، ہم نے جوایل این جی کے معاہدے کیے وہ ان کی حکومت سے 31 فیصد سستے تھے۔ ان معاہدوں سے پاکستان کو اگلے 10 سالوں میں 3 ارب ڈالرکی بچت ہوگی۔

ان کا کہنا تھا کہ یہ نکمی اورنااہل حکومت صرف مفروضوں پرچلتی ہے، امپورٹڈ حکومت بجلی گھروں کوپیسے جاری نہیں کررہی اس لیے عوام کولوڈشیڈنگ کا عذاب جھیلنا پڑرہا ہے، اس حکومت کی شاہ خرچیاں زیادہ اورحکمت عملی کم ہے۔

سابق وزیرتوانائی نے کہا کہ مہنگے مہنگے بجلی کے منصوبے لگا کرملک کا نقصان کیا گیا، پاکستان میں بجلی کا8 ہزار 800 میگا واٹ شارٹ فال ہے، پاکستان تحریک انصاف کی حکومت میں نا شارٹ فال تھا نا ہی کوئی لوڈشیڈنگ تھی۔

انہوں نے مزید کہا کہ امپورٹڈ حکومت کواپنے گریبان میں جھانک کردیکھنا ہو گا، یہ مکمل طور پر ناکام ہوچکے ہیں۔ ملک میں نئے انتخابات ہی تمام مسائل کا حل ہیں۔