وزیراعلی پنجاب حمزہ شہباز کے خلاف تمام درخواستیں چیف جسٹس لاہور ہائی کورٹ کو واپس بھجوا دی گئیں۔ 

تفصیلات کے مطابق جسٹس شجاعت علی خان نے وزیراعلی پنجاب حمزہ شہباز کے الیکشن کو کالعدم قرار دینے کے خلاف تمام درخواستیں  چیف جسٹس لاہور ہائی کورٹ کو واپس بھجوائیں۔

وکیل اظہرصدیق نے کہا کہ کیس تقریبآ چیف جسٹس صاحب کی عدالت میں مکمل ہو چکا تھا لیکن فائلیں اس کورٹ کو بھجوا دی گئی ہیں۔

جسٹس شجاعت علی خان نے ریمارکس دیے کہ درخواستوں کو ٹرانسفر کرنے کے حوالے سے کوئی آرڈر موجود نہیں ہے۔

جسٹس شجاعت علی خان نے تحریک انصاف، پرویز الہی، منیر احمد سمیت دیگر کی درخواستیں واپس چیف جسٹس کو بھجوائیں۔ درخواستوں میں وزیر اعلی حمزہ شہباز کے الیکشن کو چیلنج کیا گیا ہے۔

دوسری جانب عدالت نے پانچ مخصوص نشستوں پراراکین اسمبلی کا نوٹیفکیشن جاری نہ کرنے پرالیکشن کمیشن کونوٹس جاری کردیا۔

عدالت نے درخواستوں پر الیکشن کمیشن آف پاکستان  کو نوٹس جاری کرتے ہوئے دس روز میں جواب طلب کرلیا جبکہ  سرکاری وکیل نے جواب داخل کرنے کے لیے عدالت سے مہلت  طلب کی۔

جسٹس شجاعت علی خان نے پی ٹی آئی  کے سمیوئیل یعقوب سمیت دیگر کی درخواستوں پر سماعت کی جس میں  درخواست گزارکی طرف سے عامرسعید راں اور اظہر صدیق ایڈووکیٹس عدالت میں پیش ہوئے۔