اکثر افراد سونے سے پہلے لازمی فون کا استعمال کرتے ہیں اور اس عادت سے آپ کو کیا کیا نقصان پہنچ سکتا ہے آج ہم آپ کو بتائیں گے۔

جب آپ سونے کے لیے لیٹتے ہیں تو فون پر دن بھر کے پیغامات اور دوسری چیزیں دیکھنے کے لیے فون استعمال کرنا پسند کرتے ہیں جو کہ آپ کو اچھی رات کی نیند لینے سے روک سکتا ہے۔

 آپ کے اسمارٹ فون سے نکلنے والی روشنی نہ صرف آپ کی بصارت کو متاثر کرتی ہے بلکہ یہ آپ کی نیند میں بھی خلل ڈال سکتی ہے جس کے نتیجے میں صحت کی پیچیدگیاں پیدا ہو سکتی ہیں۔

فون استعمال کرتے وقت آپ نے کبھی محسوس کیا ہے کہ آپ کو دھندلا نظر آرہا ہے تو آپ یقینی طور پر اکیلے نہیں ہیں بلکہ یہ کئی لوگوں کے ساتھ ہوتا ہے کیونکہ جب آپ اپنے اسمارٹ فون کا استعمال کرتے ہوئے تناؤ کا شکار ہوتے ہیں تو یہ آنکھوں میں دباؤ کا باعث بن سکتا ہے، اس لئے اپنی آنکھوں کی حفاظت کے لیے اسکرین کی روشنی کو کم کرنے کی کوشش کریں اور اپنے فون کو زیادہ دیر تک استعمال کرنے سے پرہیز کریں۔

جب آپ اپنے فون کو نیچے دیکھتے ہیں تو اس کی شعاؤں سے آپ کی گردن پر لکیریں اور کریزیں بن جاتی ہیں جس کے نتیجے میں آپ وقت سے پہلے بوڑھے نظر آتے ہیں۔

اس کے علاوہ جب آپ اسکرین پر دیکھنے کے لیے اپنا سر آگے کی طرف جھکاتے ہیں تو آپ کی گردن کے پٹھوں پر دباؤ پڑتا ہے جس سے درد ہوتا ہے۔

 اگر آپ اپنے فون کو چیک کیے بغیر بستر پر جانے کا تصور نہیں کر سکتے تو اسے آنکھوں کی سطح پر رکھنے کی کوشش کریں تاکہ پٹھوں میں تناؤ پیدا نہ ہو۔