ہالی ووڈ کی ہر فلم کے آغاز میں ایک خاتون کو مشعل تھامے دکھایا جاتا ہے۔

اس لوگو کو تیار کرنے کے لیے تصویر کو پلٹرز پرائز جیتنے والی امریکی فوٹوگرافر کیتھی اینڈرسن نے 1991 میں کھینچا تھا۔

اس لوگو کی تیاری کا آغاز 1989 میں ہوا جب سونی نے کولمبیا پکچرز کو خریدا اور  پرانے لوگو کو نئی شکل دینے کے لیے کولمبیا پکچرز نے ڈاک ٹکٹ ڈیزائن کرنے والے مائیکل ڈیاز کی خدمات حاصل کیں۔

مائیکل جے ڈیاز نے اپنی دوست فوٹوگرافر کیتھی اینڈرسن سے درخواست کی لیکن کیتھی کو اس وقت اندازہ نہیں تھا کہ ان کا یہ فوٹوشوٹ دنیا بھر میں مشہور ہوجائے گا۔

کیتھی نے ایک انٹرویو میں بتایا کہ مائیکل کے ذہن میں ایک خیال تھا اور میں نے اسے کامیاب بنانے کے لیے ایسا میٹریل تیار کیا جو ہر حصے کو جگمگانے کے ساتھ ماڈل کو نمایاں کرے۔

انہوں نے بتایا کہ ماڈل کا انتخاب اتفاقاً ہوا کیونکہ جینیفر جوزف نامی خاتون ماڈل نہیں تھیں اور مائیکل ڈیاز نے اچانک فوٹوگرافر کی ساتھی سے ماڈل بننے کی درخواست کی تھی جبکہ یہ فوٹو شوٹ ایک اپارٹمنٹ کے چھوٹے سے کمرے میں سادہ سامان کے ساتھ ہوا تھا۔

مائیکل ڈیاز اس تصویر کے لیے چند شیٹس اور ایک چھوٹے لیمپ کو لے کر پہنچے جس پر بلب لگا ہوا تھا اور دیکھنے میں کسی مشعل کی طرح نظر آتا تھا۔

پہلے کولمبیا پکچرز کے لوگو میں جس لوگو کو دکھایا جاتا تھا اس میں خاتون نے سفید لباس پر امریکی پرچم لپیٹا ہوا ہوتا تھا مگر مائیکل ڈیاز نے پرچم کو نیلے رنگ کے کپڑے سے بدل دیا۔

جینیفر جوزف کو جو لباس پہنایا گیا درحقیقت لباس تھا ہی نہیں بلکہ بستر کی ایک چادر تھی جسے بار بار ٹھیک کرنا پڑتا تھا اور شروع میں کیتھی نے پولورائیڈ کیمرے سے ٹیسٹ فوٹوز لیں جبکہ 4 گھنٹے میں جاکر فوٹو شوٹ مکمل ہوا۔

ماڈل تھک کر بیٹھ گئی تو وہ تصویر بھی کیتھی اینڈرسن نے لے لی تو اب جو تصویر آپ کے سامنے آتی ہے اس میں خاتون کے ہاتھ میں جو مشعل موجود ہے وہ درحقیقت ایک لیمپ تھا۔

مائیکل ڈیاز کے مطابق انہوں نے کبھی سوچا نہیں تھا کہ ایک چھوٹے سے اپارٹمنٹ میں ہونے والا فوٹوشوٹ سلور اسکرین کا حصہ بنے گا۔

واضح رہے کہ 1992 سے اس لوگو کو کولمبیا پکچرز کی جانب سے استعمال کیا جارہا ہے۔