تنویر الیاس نے کہا کہ عوام کے مسائل حل کرنے کیلئے آئے ہیں کسی کو بیروزگار نہیں کریں گے۔

اپنے ایک بیان میں وزیر اعظم آزاد جموں و کشمیر سردار تنویر الیاس خان نے نیشنل ایم این سی ایچ پروگرام کے تحت فارغ ہونے والے ملازمین کے مسئلے کا نوٹس لے لیا۔

تنویر الیاس خان نے کہا کہ ایم این سی ایچ پروگرام کے ملازمین ریاست کا قیمتی اثاثہ ہیں، اس پراجیکٹ کو نارمل میزانیہ پر لائیں گے۔

انہوں نے یہ بھی کہا کہ عوام کی خدمت اور ان کے مسائل حل کرنے کے لیے حکومت میں آئے ہیں، کسی کو بیروزگار نہیں کریں گے۔

تنویر الیاس خان کا کہنا تھا کہ آزاد کشمیرسے بیروزگاری کے خاتمہ کے لیے سیاحت، کاٹیج انڈسٹری  اور دیگر شعبوں میں روزگار کے مواقع پیدا کریں گے۔

ان کا یہ بھی کہنا تھا کہ صحت کا شعبہ انتہائی اہمیت کا حامل ہے اس شعبہ کی ترقی کے لیے حکومت نئے منصوبے بھی شروع کریگی اور تمام طبی مراکز میں ڈاکٹرز کی ہمہ وقت دستیابی کو یقینی بنایا جائے گا۔

یاد رہے کہ  ایم این سی ایچ پروگرام کے ملازمین کی جانب سے مستقلی کے لیے ریاست بھر میں مظاہرے کیے جارہے تھے، اس سلسلہ میں ملازمین کی جانب سے وزیر اعظم آزاد کشمیر سے خط کے ذریعے مستقل کرنے کی اپیل کی گئی تھی۔

وزیر اعظم آزاد کشمیر نے معاملے کا نوٹس لیتے ہوئے ان کی نارمل میزانیہ پر منتقلی کے لیے ہدایات جاری کر دی ہیں جس سے ملازمین میں خوشی کی لہر دوڑ گئی ہے۔

ملازمین نے وزیر اعظم آزاد کشمیر کو اس فیصلے پر زبردست خراج تحسین پیش کرتے ہوئے ان کا شکریہ کیا اور کہا کہ وزیر اعظم آزاد نے 1242 ملازمین کو مستقل کر کے سینکڑوں ملازمین کے ہزاروں اہلخانہ کا چولہا بھیجنے سے بچا لیا ہے۔

2007ء میں برطانیہ کے ایک ادارے کے تعاون سے پاکستان اور آزادکشمیر میں ماں اور بچے کی صحت کے حوالہ سے ادارہ قائم کیا ، اس پراجیکٹ میں 12 سو  سے زائد ملازمین  15 سال سے ایم این سی ایچ پروگرام کے تمام مراکز میں 24 گھنٹے خدمات دے رہے تھے۔

واضح رہے کہ وزیر اعظم آزاد جموں و کشمیر سردار تنویر الیاس خان کے ایم این سی ایچ پروگرام کے ملازمین  کی مستقلی کے اقدام کو آزاد کشمیر کے عوام کی جانب سے بھی بھرپور سراہا جا رہا ہے۔