معروف مذہبی اسکالر اور ایم این اے ڈاکٹرعامر لیاقت حسین کی میت بغیرپوسٹ مارٹم ورثا کے حوالے کردی گئی۔ 

تفصیلات کے مطابق سٹی کورٹ کراچی میں جوڈیشل مجسٹریٹ شرقی نوکرعباس کے چیمبرمیں ڈاکٹرعامر لیاقت حسین کے ورثا اور پولیس کی درخواستوں پرسماعت کرتے ہوئے پولیس سرجن کو میت کا معائنہ کرنے کی ہدایت کی تھی۔

عدالت کی ہدایت کے بعد پولیس میڈیکل سرجن رپورٹ کے ساتھ چھیپا سرد خانے پہنچی، مجسٹریٹ بھی پولیس سرجن کے ہمراہ موجود تھے۔

وکیل اہل خان خورشید خان ایڈوکیٹ کے مطابق عدالت نے میت کی جانچ  کے بعد رپورٹ پیش کرنے کی ہدایت کی ہے۔ عدالت پولیس سرجن کی رپورٹ کی روشنی میں پوسٹ مارٹم سے متعلق فیصلہ کرے گی۔

درخواستوں پرسماعت کے دوران مجسٹریٹ کے چیمبرمیں ڈاکٹرعامرلیاقت حسین کے اہلِ خانہ، پولیس سرجن ڈاکٹر سمعیہ اور افسران موجود تھے۔

ڈاکٹرعامرلیاقت کے بیٹے احمد عامر نے پوسٹ مارٹم نہ کرنے اور میت حوالگی کی درخواست میں مؤقف اختیار کیا کہ اہل خانہ پوسٹ مارٹم نہیں کروانا چاہتے۔ اہل خانہ قانونی ضابطے کے لیے بیان حلفی دینے کو تیار ہیں۔

دوسری جانب پولیس نے تحقیقات اور وجہ موت کی جانچ کے لیے پوسٹ مارٹم کے لیے درخواست دائر کی جس میں پولیس حکام نےمؤقف اختیار کیا کہ ڈاکٹرعامرلیاقت کا قتل ہوا یا طبعی موت ہے یہ پتا کرنا ہے۔ ہمیں پوسٹ مارٹم کی اجازت دی جائے۔

واضح رہے کہ پولیس کے ساتھ مذاکرات ناکام ہونے کے بعد مرحوم کی میت ورثا کے حوالے نہیں کی گئی جس کے بعد مرحوم ڈاکٹرعامر لیاقت کا بیٹا احمد اور بیٹی دعا چھیپا سرد خانے سے بنا لاش وصول کیے روانہ ہوئے اورعدالت سے رجوع کیا۔

پولیس حکام کا کہنا تھا کہ 174 کی کارروائی کے بعد پوسٹ مارٹم ہرصورت لازمی ہے۔ ہم نے عامر لیاقت کی لاش کو تدفین سے نہیں روکا۔ ہم نے کہا ہے کہ عدالت سے اجازت لے کر میت لے جائیں۔

پولیس کے مطابق قانونی طور پر دفعہ 174 کی کارروائی کے بغیر لاش حوالے نہیں ہوتی۔ اس کارروائی نہ کرنے کی ہدایت دینے والی مجازعدالت ہے۔ ورثا عدالت کو فیصلے سے آگاہ کر کے اجازت حاصل کر سکتے ہیں۔ اس کے بغیر پولیس کے لیے ممکن نہیں کے لاش حوالے کی جائے۔