سلمان رفیق نے کہا ہے کہ صفائی ستھرائی کے انتظامات میں کسی قسم کی کوتاہی برداشت نہیں ہوگی۔

صوبائی وزیر خواجہ سلمان رفیق طبی سہولیات کاجائزہ لینے اچانک ڈسٹرکٹ ہیڈ کوارٹرز ہسپتال قصور پہنچ گئے۔

صوبائی وزیر نے ڈی ایچ کیوہسپتال قصورمیں ایمرجنسی اور آپریشن تھیٹرزسمیت دیگرشعبہ جات کا دورہ کرکے مریضوں کی عیادت کی جبکہ انہوں نے صفائی ستھرائی سمیت ادویات کی فراہمی کا بھی جائزہ لیا۔

ایم ایس ڈی ایچ کیو ہسپتال قصور ڈاکٹر نیاز احمد نے صوبائی وزیر خواجہ سلمان رفیق کو مریضوں کو دی جانے والی طبی سہولیات کی تفصیلات سے آگاہ کیا۔

اس موقع پر خواجہ سلمان رفیق نے ڈی ایچ کیوہسپتال قصور میں بجلی کی فراہمی کو یقینی بنانے اور منصوبوں کی تکمیل کیلئے لیسکواور سی اینڈڈبلیوکے افسران کو ہدایات بھی جاری کیں۔

صوبائی وزیر خواجہ سلمان رفیق نے اظہارخیال کرتے ہوئے کہا کہ ڈی ایچ کیو ہسپتال قصور میں کسی مریض کو پریشانی نہیں ہونی چاہیے۔

انہوں نے کہا کہ پنجاب کے سرکاری ہسپتالوں میں صفائی ستھرائی کے انتظامات میں کسی قسم کی کوتاہی برداشت نہیں ہوگی۔

خواجہ سلمان رفیق نے یہ بھی کہا کہ پنجاب کے سرکاری ہسپتالوں میں آنے والے مریضوں کیلئے آسانیاں پیداکی جائیں جبکہ پنجاب کے سرکاری ہسپتالوں کے ایم ایس حضرات مریضوں کے بہترعلاج معالجہ کو یقینی بنائیں۔

صوبائی وزیر خواجہ سلمان رفیق نے مزید کہا کہ پنجاب کے مختلف سرکاری ہسپتالوں کے سرپرائز دورے جاری رہیں گے جبکہ وزیراعلیٰ پنجاب حمزہ شہباز کی ہدایت پر صوبہ کے سرکاری ہسپتالوں میں مریضوں کو صحت کی بہتر سہولیات فراہم کریں گے۔