مریم اورنگزیب نے کہا ہے کہ میڈیا ریاست کا چوتھا ستون ہے۔

وفاقی وزیر اطلاعات مریم اورنگزیب نے میڈیا سے گفتگو کرتے ہوئے کہا ہے کہ پی ٹی وی قومی نشریاتی ادارہ اور ریاست کی آواز ہے، پی ٹی وی پاکستان کی قومی شناخت ہے۔

انہوں نے کہا کہ پی ٹی وی کی وجہ سے باقی براڈ کاسٹرز نے بھی جنم لیا، پاکستان کے عوام کو میڈیا کے ذریعے خبر ملتی ہے، میڈیا ریاست کا چوتھا ستون ہے، پی ٹی وی اسپورٹس واحد اسکرین ہے جس سے پی ٹی وی ریونیو حاصل کرتا ہے۔

مریم اورنگزیب نے کہا ہے کہ پاکستان کے عوام 35 روپے لائسنس فیس کی مد میں پی ٹی وی کو ادا کرتے ہیں، ان ذرائع آمدن سے پی ٹی وی اپنے خراجات پورے کرتا ہے، 2014 کے دھرنے میں عمران خان نے اس ادارے پر حملہ کروایا اور ایک دوسرے کو مبارکبادیں دیں۔

 وفاقی وزیر اطلاعات نے کہا کہ عمران خان نے اس وقت اپنی ٹیم اور اپنے کارکنوں کو شاباش دی، پی ٹی آئی کی حکومت نے ایک کروڑ نوکریوں اور پچاس لاکھ گھروں کے جھوٹے وعدے کیے۔

انہوں نے کہا کہ سابقہ حکومت نے پاکستان کے عوام کو سبز باغ دکھائے، انہوں نے ریڈیو اور پی ٹی وی کی عمارتوں کو نیلام کرنے کی کوشش کی، ہماری حکومت آئی تو معلوم ہوا پی ٹی وی اسپورٹس کا کرکٹ رائٹس کے لئے نجی چینلز سے معاہدہ ہوا ہے۔

مریم اورنگزیب نے کہا ہے کہ آسان راستہ تھا کہ فوری طور پر پریس ٹاک کر کے الزام لگاتے اور انہیں جیلوں میں ڈال کر بھول جاتے، سابق دور میں پی ٹی وی کے ساتھ جو کچھ ہوا اس کے نتائج آج پی ٹی وی بھگت رہا ہے۔

وفاقی وزیر اطلاعات نے کہا ہے کہ اپریل 2022ء میں ہم نے فیکٹ فائنڈنگ کمیٹی قائم کی۔