سعد حسین رضوی نے کہا ہے کہ آئندہ الیکشن میں عوام کی اُمیدوں کا محور تحریک لبیک پاکستان ہو گی۔

امیر تحریک لبیک پاکستان حافظ سعد حسین رضوی نے پیٹرولیم مصنوعات کی قیمتوں میں اضافے پر ردعمل دیتے ہوئے کہا ہے کہ پیٹرول اور بجلی کی قیمتوں میں ہوشربا اضافہ عوام کی مشکلات و پریشانی میں مزید اضافے کا باعث بنے گا۔

انہوں نے کہا کہ خوردنی اشیاء کی قلت اور مہنگائی دن بدن شدت اختیار کرتی جا رہی ہے، موجودہ اور سابقہ حکمرانوں نے غریبوں کا خون تک نچوڑ لیا ہے، ایک دوسرے پر سبقت کی دوڑ میں ہر شخص اپنے مفاد کی خاطراپنی ضروریات کی تکمیل کے حصول کے لئے انسانی قدروں کو پامال کر رہا ہے۔

   سعد حسین رضوی نے کہا ہے کہ آئندہ الیکشن میں عوام کی اُمیدوں کا محور تحریک لبیک پاکستان ہو گی، ن لیگ، پی ٹی آئی اور پیپلزپارٹی تینوں جماعتیں آئی ایم ایف کی غلامی میں ایک پیج پر ہیں۔

امیر تحریک لبیک پاکستان نے کہا ہے کہ اسلامی طرز عمل سے پاکستان کو حقیقی معنوں میں اسلامی اور فلاحی ریاست بنائیں گے، پاکستان کی عوام کی خوشخالی، فلاح و بہبود اور ترقی کے لیے دن رات ایک کریں گے۔

انہوں نے کہا کہ مزدور طبقہ اور عام آدمی کی بنیادی ضرورتوں کو اولین ترجیح رکھیں گے اور ملک کو ترقی کی راہ پر گامزن کر کے دم لیں گے۔