چیئرمین سینیٹ نے کہا ہے کہ بچوں کی تعلیم وتربیت پر توجہ دینا معاشرے کے ہرد فرد کی ذمہ داری ہے۔

چیئرمین سینیٹ محمد صادق سنجرانی نے چائلڈ لیبر ڈے کی مناسبت سے اپنے پیغام میں کہا کہ چائلڈ لیبر سے متعلق قوانین پر عمل درآمد کیلئے ٹھوس کوششوں کی ضرورت ہے۔

انہوں نے کہا کہ بچوں کو فیکٹریوں، کارخانوں اور گھروں میں کام کرنے کے بجائے اسکولوں میں ہونا چاہیے۔

صادق سنجرانی کا کہنا تھا کہ ہر بچے کو تعلیم اور بہتر صحت کا حق حاصل ہے، بچوں کی تعلیم وتربیت پر توجہ دینا معاشرے کے ہرد فرد کی ذمہ داری ہے۔

چیئرمین سینیٹ نے کہا کہ بچے پاکستان کا مستقبل ہیں اور ایوان بالا میں چائلڈ لیبر کے خاتمے کیلئے موثر قانون سازی کی گئی ہے، بچوں کو چائلڈ لیبر کی بجائے معیاری تعلیم کی فراہمی ہمارا مقصد ہے۔

انہوں نے یہ بھی کہا کہ بچوں کی تعلیم و تربیت پر جتنی توجہ دی جائے قوموں کی ترقی کے امکانات اتنے روشن ہوتے ہیں۔

چیئرمین سینیٹ محمد صادق سنجرانی نے مزید کہا کہ پاکستان چائلڈ لیبر کے روک تھام کیلئے اپنی بین الاقوامی ذمہ داریوں پر قائم ہے، معصوم بچوں سے جبری مشقت کے خاتمے کے لیے سب کو مل کر اپنا حصہ ڈالنا ہوگا۔