وفاقی وزیر اطلاعات مریم اورنگزیب نے ریڈیو پاکستان راولپنڈی کے سینکڑوں قدیم اور قیمتی درختوں کی کٹائی پر سخت نوٹس لے لیا ہے۔

اس حوالے سے مریم اورنگزیب نے اپنے جاری کردہ بیان میں کہا کہ ذمہ داروں کا تعین کرکے قانون کے مطابق کارروائی کریں گے۔

انہوں نے کہا کہ بلین ٹری سونامی کے دعوں میں قدیم اور قیمتی درختوں کی کٹائی کیسے ہوئی، حقائق قوم کے سامنے لائیں گے۔

وفاقی وزیر کا کہنا ہے کہ بلین ٹری سونامی ریڈیو پاکستان کے درخت کھا گئی، بلین ٹری کرپشن سونامی سے ریڈیو پاکستان کے درختوں کی کٹائی کے ثبوت برآمد ہوئے ہیں۔

مریم اورنگزیب نے کہا کہ بظاہر یہ لگتا ہے کہ ساری کارروائی مجاز اتھارٹی کی منظوری کے بغیر عمل میں آئی۔

وفاقی وزیر اطلاعات نے متعلقہ حکام سے فوری طور پر معاملے کی رپورٹ طلب کرلی۔

مریم اورنگزیب نے وفاقی سیکرٹری وزارت کو قائمہ کمیٹی برائے اطلاعات و نشریات کے اجلاس کی مکمل کارروائی کے منٹس اور ریڈیو پاکستان کی تحقیقاتی رپورٹ پیش کرنے کا حکم بھی دے دیا۔

انہوں نے کہا کہ وفاق اور پنجاب کی ماحولیاتی تحفظ کی ایجنسیوں اور راولپنڈی کنٹونمنٹ بورڈ کو بھی اعتماد میں نہیں لیا گیا، درختوں کی اقسام، ان کی عمروں اور ان کی مارکیٹ قیمتوں کے تعین کے لئے ماہرین کی مدد نہیں لی گئی۔

وفاقی وزیر نے مزید کہا کہ آم، شیشم، شہتوت، ریٹھا اور شاہ بلوط سمیت 600 سے زائد درختوں کی کٹائی سنگین معاملہ ہے، ذمہ داروں کے خلاف سخت کارروائی کی جائے گی۔