پی ٹی آئی کے پارلیمانی لیڈر سندھ اسمبلی خرم شیرزمان نے کہا ہے کہ آئی ایم ایف کے غلام مسلسل عوام کا صبرآزما رہے ہیں۔

خرم شیرزمان نے بجلی کی قیمتوں میں اضافے پر ردعمل دیتے ہوئے کہا کہ حکومت کا بجلی کی قیمتوں میں اضافے کو مسترد کرتے ہیں، بجلی کی قیمت ایک بار پھر بڑھانے کا فیصلہ شرمناک ہے۔

انہوں نے کہا کہ لٹیرے حکمران بجلی کی قیمتوں سے عوام کے خون کا آخری قطرہ بھی چوس لیں گے، فیول ایڈجسٹمنٹ کے نام پرٹارگٹڈ کرپشن ایڈجسٹمنٹ کی جارہی ہے۔

پارلیمانی لیڈر کا کہنا ہے کہ گزشتہ رات کراچی سمیت مختلف علاقوں میں بجلی نہیں تھی، پی ڈی ایم نے عوام کو سنہرے خواب دکھا کر بیوقوف بنایا ہے، آئی ایم ایف کے غلام مسلسل عوام کا صبر آزمارہے ہیں۔

خرم شیرزمان نے مزید کہا کہ عمران خان کی جاسوسی کے بجائے امپورٹڈ حکام اپنی کارکردگی عوام کو دکھائیں، جس طرح مہنگائی سے عوام کی کمر توڑ رہے ہیں یہ عوام کو منہ نہیں دکھاسکیں گے۔

واضح رہے کہ نیشنل الیکٹرک پاور ریگولیٹری اتھارٹی (نیپرا) نے بجلی کی قیمت میں فی یونٹ 7.90 روپے اضافے کی منظوری دے دی ہے۔

بجلی مہنگی کرنے کی منظوری مئی کی ماہانہ فیول ایڈجسٹمنٹ کی مد میں کیا گیا جو صارفین سے جولائی کے بل میں وصول کیا جائے گا۔

سینٹرل پاور پرچیزنگ ایجنسی (سی پی پی اے) نے توانائی کے شعبے کے ریگولیٹرز سے درخواست کی تھی کہ مئی کے دوران مختلف ذرائع سے حاصل ہونے والی بجلی کی مجموعی پیداوار پر فی یونٹ 13 روپے 90 پیسے خرچ ہوئے۔