کشمیر پریمیئر لیگ (کے پی ایل) کی انتظامیہ نے تصدیق کی ہے کہ پہلے سیزن کی فرنچائزز کے باقی تمام واجبات اب کلیئر کر دیے گئے ہیں جن میں پلیئر آف دی میچ ایوارڈز، پلیئر آف دی ٹورنامنٹ، بہترین فیلڈر، وکٹ کیپر اور بیٹر ایوارڈز بھی شامل ہیں۔

تفصیلات کے مطابق یہ کارروائی ٹورنامنٹ کی چار فرنچائزز، باغ اسٹالینز، راولاکوٹ ہاکس، مظفرآباد ٹائیگرز اور میرپور رائلز کی جانب سے واجبات کی ادائیگی کے حوالے سے پی سی بی کو مشترکہ شکایت بھیجنے کے بعد کی گئی۔

واضح رہے کہ کے پی ایل کے پہلے ایڈیشن میں آصف آفریدی کو مین آف دی فائنل اور باؤلر آف دی ٹورنامنٹ سے نوازا گیا، ذیشان اشرف بہترین بلے باز جبکہ وسیم جونیئر کو بہترین فیلڈر کا ایوارڈ دیا گیا۔

 بہترین وکٹ کیپر کا ایوارڈ بسم اللہ خان کو دیا گیا جبکہ حسین طلعت کو پلیئر آف دی ٹورنامنٹ کا ایوارڈ ملا۔

حکام کے مطابق تمام نقد انعامات اب جیتنے والوں کو دیے گئے ہیں جس میں 16 مین آف دی میچ ایوارڈز بھی شامل ہیں۔

واضح رہے کہ کے پی ایل کا دوسرا ایڈیشن یکم اگست سے 14 اگست تک مظفرآباد میں کھیلا جائے گا،ٹورنامنٹ  میں چھ ٹیمیں ہوں گی جن میں راولاکوٹ ہاکس، کوٹلی لائنز، میرپور رائلز، مظفرآباد ٹائیگرز، اوورسیز واریئرز اور باغ اسٹالینز شامل ہیں۔