سیالکوٹ میں عمران خان کا جلسہ دوسری جگہ منتقل کرنے کے تنازع پرسیشن جج کا افسران کے خلاف اندراجِ مقدمہ کا حکم معطل کر دیا گیا۔ 

تفصیلات کے مطابق لاہورہائیکورٹ نے سیالکوٹ میں سابق وزیراعظم عمران خان کا جلسہ دوسری جگہ منتقل کرنے کے تنازع پرسیشن جج کا ڈی سی، ڈی پی او سیالکوٹ  سمیت دیگرافسران کے خلاف اندراج مقدمہ کا حکم معطل کردیا۔

عدالت نے فریقین اور پی ٹی آئی کے رہنماء عثمان ڈار سے آئندہ سماعت پر جواب طلب کرلیا۔

لاہور ہائی کورٹ نے ایس ایچ او مراد پورسیالکوٹ کی درخواست پر حکم جاری کیا۔

درخواست گزار نے مؤقف پیش کیا کہ پی ٹی آئی 14مئی کو مسیحیوں کے لیے مختص گراؤنڈ سیالکوٹ میں عمران خان کا جلسہ کرنا چاہتی تھی. مسیحیوں کی مذہبی رسومات کے لیے مختص گراؤنڈ ہونے کے باعث پی ٹی آئی کو جلسے کی اجازت نہیں دی۔

درخواست میں مؤقف پیش کیا گیا کہ ڈپٹی کمشنر نے پی ٹی آئی کو متبادل جگہ پر جلسہ کرنے کی اجازت دی۔ پی ٹی آئی کے زبردستی جلسہ کرنے کے باعث  پولیس نے انہیں روکا، جلسہ کرنے سے منع کیا۔

وکیل درخواست گزار نے عدالت کو یہ بھی بتایا کہ پی ٹی آئی کے رہنما عثمان ڈار کی درخواست پر سیشن عدالت سیالکوٹ نے ڈی سی سمیت دیگر افسران کے خلاف اندراج مقدمہ کا حکم دیا۔ آرپی او گوجرانوالہ نے بھی پولیس کی بے گناہی کے متعلق سیشن جج کو رپورٹ دی تھی۔

درخواست میں مؤقف پیش کیا گیا کہ سیشن جج نے یک طرفہ مؤقف کی بنا پر افسران کے خلاف اندراج مقدمہ کا حکم جاری کیا۔ عدالت سے استدعا ہے کہ عدالت سیشن کورٹ کا اندراج مقدمہ کا حکم کالعدم قراردے۔