سانجھے کی ہنڈیا بیچ چوراہے میں پھوٹ پڑنے لگی، 13 جماعتوں پر مشتمل اتحاد میں اختلافات دن بہ دن سنگین ہوتے جارہے ہیں۔

ایم کیوایم پاکستان کے بعد بلوچستان عوامی پارٹی (باپ ) نے بھی آنکھیں دکھان اشروع کردیں۔ ۔بلوچستان عوامی پارٹی کے رہنما خالد مگسی اورآزاد ایم این اے اسلم بھوتانی نے وزیراعظم سےملاقات میں شکایات کے ڈھیرلگا دیے۔

خالد مگسی نے کہا کہ ہمیں اہم فیصلوں کا پتہ ہی نہیں ہوتا، غیرمشروط طور پر آپ کے ساتھ ہیں مگرنظراندازنہ کریں،

ہمیں مشاورت کے عمل سے باہرنہ رکھیں، اپنے حقوق پرسودے بازی نہیں کریں گے۔

اس موقع پراسلم بھوتانی کا کہنا تھا کہ آپ (وزیر اعظم) ہم سے ملنا گوارا نہیں کرتے اس لیے اسمبلی میں بات کرنا پڑی۔ ہم اپنی ذات کے لیے نہیں حلقے کے لیے فنڈزمانگتے ہیں۔ آصف زرداری کی محبت میں آپ کے ساتھ آئے، مگرمحبت مہنگی پڑ رہی ہے۔

شہبازشریف کا اپنے اتحادیوں کے گلے شکووں پرکہنا تھا کہ محبت قائم رہنی چاہیے تاخیرسے ملنے پرمعافی چاہتا ہوں اب کوئی شکایت نہیں ہوگی، آئندہ مجھے براہ راست کال یا میسج کریں۔

دوسری جانب ایک اور اتحادی جماعت ایم کیوایم پاکستان نے بھی سندھ کے بلدیاتی انتخابات پرتحفظات کا اظہارکردیا ہے۔

الیکشن کمیشن کے باہرمیڈیا سے گفتگومیں خالد مقبول صدیقی کا کہنا تھا کہ سندھ میں ہونے والے بلدیاتی انتخابات اصل میں انتخابات تھے ہی نہیں۔ ہم نے اپنے تحفظات وزیراعظم کوبتادیے ہیں۔ انہوں نے کہا کہ ہماری سیاسی آزادی اب بھی رکی ہوئی ہے۔ اپنے تحفظات پروزیراعظم سے کل ملاقات کریں گے۔