بھارت میں اسلامو فوبیا کی بڑھتی ہوئی لہر اور نفرت کے پیش نظر پاکستان نے اقوام متحدہ سے سخت نوٹس لینے کا مطالبہ کردیا ہے۔

تفصیلات کے مطابق سیکرٹری خارجہ سہیل محمود کی  اقوام متحدہ کی سلامتی کونسل کے 5 مستقل رکن ممالک کے سفیروں سے ملاقات ہوئی۔

سیکرٹری خارجہ نے سفیروں کو ہندوستان کی حکمراں جماعت کے دو سینئر عہدیداروں کی طرف آنحضرت محمد صلی اللہ علیہ وسلم کے لئے  تضحیک آمیز اور جارحانہ الفاظ سے آگاہ کیا۔

انہوں نے بتایا کہ بی جے پی حکومت کی جانب سے گستاخی کے مرتکب افراد کے خلاف علامتی کارروائی کی گئی جس پر فرضی کارروائی سے دنیا بھر میں مسلمانوں کو پہنچنے والے نقصان کو کم نہیں کیا جاسکتا ہے۔

انہوں نے مزید کہا کہ رہنماؤں کی جانب سے توہین آمیز الفاظ بی جے پی کی قیادت اور ہندوستانی حکومت کی ناکامی ’ہندوتوا‘ نظرے کی عکاسی ہے۔

 ملاقات کے دوران سہیل محمود نے مطالبہ کیا کہ  بھارت میں اسلامو فوبیا کی بڑھتی ہوئی لہر اور نفرت کا پی 5 ممالک نوٹس لیں اور ذمہ داروں کے خلاف سخت کارروائی کرنے کے لئے بھارت پر زور دیا جائے۔

سیکرٹری خارجہ  کے مطابق ہندوستان کو اپنی مذہبی اقلیتوں بالخصوص مسلم آبادی کے حقوق سلب کرنے کے لیے بھی جوابدہ ہونا چاہیے، بھارتی مسلمانوں کے بنیادی حقوق اور آزادیوں کے مکمل تحفظ کو یقینی بنانے پر زور دیا جانا چاہیے۔