برطانوی فضائی کمپنی ’برٹش ایئرویز‘ نے اسلام آباد کے لیے اپنی پروازیں معطل کرنے کا فیصلہ کرلیا۔

نجی خبر رساں ادارے کی رپورٹ کے مطابق برطانوی فضائی کمپنی ’برٹش ایئرویز‘ نے آپریشنل وجوہات کی بناء پر 15 جون سے 30 جون پروازیں معطل کرنے کا فیصلہ کیا ہے۔

اس حوالے سے برطانوی فضائی کمپنی کے اسٹیشن مینجر نے اسلام آباد انٹرنیشنل ایئرپورٹ کی انتظامیہ کو آگاہ کردیا ہے۔

سول ایوی ایشن اتھارٹی کے ترجمان کا کہنا ہے کہ پروازوں کی معطلی صرف برطانوی فضائی کمپنی کی آپریشنل وجوہات کی بناء پر کی جارہی ہیں، سوشل میڈیا پر ایندھن کی عدم دستیابی کے باعث پروازیں معطل کرنے کی خبریں بے بنیاد ہیں۔

واضح رہے کہ اس سے قبل برطانوی فضائی کمپنی نے لاہور سے لندن فلائٹ آپریشن باقاعدہ بند کردیا تھا جس کا اعلان رواں سال 6 جنوری کو کیا گیا تھا۔

رپورٹس کے مطابق برطانوی فضائی کمپنی نے اکتوبر 2020 کو لاہور سے لندن پروازوں کا آغاز کیا تھا جبکہ انہوں نے لاہور آپریشن کے لیے بوئنگ 787 طیارے استعمال کیے تھے۔

اس حوالے سے ترجمان سول ایوی ایشن اتھارٹی کا کہنا تھا کہ برطانوی فضائی کمپنی نے آپریشنل وجوہات کی بناء پر اپنا آپریشن لاہور سے اسلام آباد منتقل کردیا ہے۔

انہوں نے کہا تھا کہ اب موسم گرما میں لاہور سے برطانیہ پروازیں نہیں جائیں گی جبکہ اسلام آباد سے پروازوں کی فریکوئنسی میں اضافہ کیا جائے گا۔