عثمان ڈار نے کہا ہے کہ ملک کو خوشحالی کی راہ پر عمران خان نے ڈالا، آئندہ بھی وہی ڈالیں گے۔

طلال چوہدری کے بیان پر پاکستان تحریک انصاف کے رہنما عثمان ڈار نے ردعمل دیتے ہوئے کہا کہ چوروں نے آوارہ “تنظیم سازوں“ کو اپنے کرتوت چھپانے پر لگا رکھا ہے۔

انہوں نے کہا کہ مسلم لیگ شریفوں کی گھر کی لونڈی نہ ہوتی تو اوباش چودھری جیسے کردار سیاست بے آبرو نہ کرتے، کل پوری قوم عمران خان کے ساتھ کھڑی ان امپورٹڈ کٹھ پتلیوں سے اپنی نفرت کا اظہار کررہی تھی۔

عثمان ڈار کا کہنا تھا کہ قاتل اور منشیات فروش نے پہلے بدترین پولیس گردی کے ذریعے عوام کے آئینی و جمہوری حقوق پر ڈاکہ ڈالا، دولت کے پجاری میر جعفروں نے آج کھلے عام نیب پر ڈاکہ ڈالا ہے۔

پاکستان تحریک انصاف کے رہنما کا یہ بھی کہنا تھا کہ یہ قوم چوروں کی جانب سے نیب قانون میں ترمیم کے ذریعے 1200 ارب روپے ہضم کرنے کی کوشش کامیاب نہیں ہونے دے گی۔

انہوں نے کہا کہ بھگوڑا بزدل اپنے درباریوں کے ذریعے قوم کا چوری کیا گیا مال ہڑپ کرنے کی کتنی ہی کوشش کرلے اسے یہ مال ڈکارنے نہیں دیں گے۔

عثمان ڈار کا کہنا تھا کہ کپتان کے اعلان سے پہلے ہی بزدل اوباشوں کی سانسیں خشک ہورہی ہیں، حقیقی آزادی کی تحریک کا یہ مرحلہ پہلے سے زیادہ ولولہ انگیز اور نتیجہ خیز ہوگا، انشاءاللہ۔

انہوں نے کہا کہ نوجوان اس تحریک کا ہراول دستہ، حقیقی آزادی کے حصول تک قطعاً چین سے نہیں بیٹھیں گے۔

پاکستان تحریک انصاف کے رہنما عثمان ڈار نے مزید کہا کہ ملک کو خوشحالی کی راہ پر عمران خان نے ڈالا، آئندہ بھی وہی ڈالیں گے، این آر او  ٹو کے ہر مجرم ہر کردار کا محاسبہ تاریخ اور عوام ملکر کریں گے۔

واضح رہے اس سے قبل پاکستان مسلم لیگ (ن) کے رہنما اور سابق وزیر مملکت داخلہ طلال چوہدری نے اپنے ایک بیان میں کہا تھا کہ عمران خان کی احتجاج کی تینوں کالز بری طرح ناکام ہوئیں۔

انہوں نے کہا کہ جس دن عمران خان کی چوری پکڑی جائے اس دن انقلاب آجاتا ہے۔

طلال چوہدری کا کہنا تھا کہ کسی کمپنی کی ڈائریکٹر فرح گوگی ،کسی کی پنکی باجی ہے، عمران خان نے اپنی گھر والی کے نام پر درجنوں کمپنیاں بنائیں۔

ان کا یہ بھی کہنا تھا کہ انقلاب اتنے لوگ اکٹھے کرنے سے نہیں آتا جبکہ عمران خان کا انقلاب آنسو گیس،لاٹھی چارج سے ڈرتا ہے۔

پاکستان مسلم لیگ (ن) کے رہنما اور سابق وزیر مملکت داخلہ طلال چوہدری کا مزید کہنا تھا کہ کل عمران خان نے ناکام احتجاج کی ہیٹرک مکمل کی، ہم نے کل کسی کو بھی احتجاج میں جانے سے نہیں روکا اور نہ ہی پولیس نے کوئی کارروائی کی۔