مریم اورنگزیب نے کہا ہے کہ 6 سے 15 جون تک ساڑھے 3 گھنٹے لوڈشیڈنگ ہوگی۔

وفاقی وزیر اطلاعات مریم اورنگزیب نے پریس کانفرنس کرتے ہوئے کہا ہے کہ کابینہ نے سرکاری ملازمین کے فیول میں 40 فیصد کٹوتی کی منظوری دیدی ہے۔

انہوں نے کہا کہ سرکاری ملازمین کے فیول میں 33 فیصد کمی کی تجویز دی گئی تھی، وفاقی کابینہ نے ہفتے کی چھٹی بحال کردی ہے، ہفتے کی چھٹی سے77ارب روپے کی بچت ہوگی، جمعہ کوگھرسے کام کرنے کی تجویز دی گئی تھی۔

مریم اورنگزیب نے کہا ہے کہ پورٹ قاسم سے600میگاواٹ بجلی سسٹم میں شامل کی جائے گی، کے تھری منصوبے و دیگر سے2 ہزار871میگاواٹ سسٹم میں شامل کیا گیا، مختلف پروجیکٹس پرہنگامی بنیادوں پرکام شروع کردیا ہے۔

 وفاقی وزیر اطلاعات نے کہا ہے کہ سولراور ونڈ سے بھی آنے والے سالوں میں بجلی پیدا ہو گی، 6 سے 15 جون تک ساڑھے3گھنٹے لوڈشیڈنگ ہوگی، 16 سے 24 جون تک لوڈشیڈنگ کا دورانیہ3گھنٹے ہو جائے گا۔

انہوں نے کہا کہ 25 سے 29 جون تک ڈھائی گھنٹے لوڈشیڈنگ ہوگی، 30 جون تک لوڈشیڈنگ کا دورانیہ2گھنٹے ہو جائے گا، 2018 میں 14 ہزار میگاواٹ بجلی سسٹم میں ڈالی گئی تھی، ملک میں بجلی کی ڈیمانڈ28ہزار400میگاواٹ ہے۔

 مریم اورنگزیب نے کہا ہے کہ 25 ہزار 800 میگاواٹ بجلی سسٹم میں موجود ہے، بجلی کی طلب اور رسد میں4ہزار600میگاواٹ کا فرق ہے، ملک میں بجلی کی طلب پیداوار سے زیادہ ہے۔

وفاقی وزیر اطلاعات نے کہا ہے کہ لوڈ شیڈنگ سے متعلق رپورٹ کابینہ کو پیش کی گئی، گزشتہ4سالوں میں بجلی کی پیداواراورطلب کا جائزہ لیا گیا۔