کورونا کیسز میں اضافے کے پیش نظر نیشنل کمانڈ اینڈ آپریشن سینٹر (این سی او سی) نے عید الاضحیٰ کے لیے نئی ہدایات جاری کردیں۔

نیشنل کمانڈ اینڈ آپریشن سینٹر نے ملک بھر میں عید الاضحیٰ سے متعلق رہنما ہدایات جاری کرتے ہوئے کہا کہ عید الاضحیٰ کی نماز کے اجتماعات مساجد کے بجائے کھلے مقامات اور میدانوں میں منعقد کیے جائیں۔

این سی او سی کے مطابق کورونا وائرس سے بچاؤ کے لیے احتیاطی تدابیر اختیار کرنا بہت ضروری ہے لہذا رش کو کم رکھنے کے لیے ایک ہی مسجد میں 2 یا 3 اجتماعات منعقد کیے جائیں۔

اس حوالے سے این سی او سی نے علمائے کرام اور خطیب سے اپیل کرتے ہوئے کہا کہ وہ نماز عید کے خطبات کو مختصر رکھیں اور لوگوں کو ماسک اور سینیٹائزر کے استعمال کی تلقین کریں جب کہ کورونا وائرس کی علامات جیسے بخار وغیرہ ظاہر ہونے کی صورت میں نماز کے اجتماعات میں شرکت کرنے سے گریز کریں۔

این سی او سی نے شہریوں کے لیے بھی نئی گائیڈ لائنز جاری کردیں جس میں اپیل کی گئی ہے کہ عید الاضحی کی نماز کھلے مقامات پر ادا کریں اور ماسک کا استعمال کرتے ہوئے رش والے مقامات پر جانے سے گریز کریں۔

COVID-19 Statistics 05 July 2022
Total Tests in Last 24 Hours: 18,950
Positive Cases: 653
Positivity %: 3.45%
Deaths: 00
Patients on Critical Care: 162

— NIH Pakistan (@NIH_Pakistan) July 5, 2022

خیال رہے کہ گزشتہ 24 گھنٹے کے دوران ملک بھر میں مزید 653 افراد میں کورونا وائرس کی تصدیق ہوئی ہے۔

دوسری جانب قومی ادارہ صحت (این آئی ایچ) کی جانب سے جاری کردہ اعداد و شمار کے مطابق 24 گھنٹوں کے دوران ملک میں مثبت کیسز کا تناسب 3.45 فیصد رہا۔

قومی ادارہ صحت کی جانب سے ٹوئٹ میں کہا گیا کہ گزشتہ 24 گھنٹوں کے دوران ملک بھر میں کورونا وائرس کی تشخیص کے لیے 18 ہزار 950 ٹیسٹ کیے گیے تاہم کورونا وائرس سے متاثر ہونے کے باعث ملک میں کوئی ہلاکت رپورٹ نہیں ہوئی جب کہ مختلف ہسپتالوں میں زیر علاج 162 افراد کی حالت تشویش ناک ہے۔