عالمی منڈی میں خام تیل کی قیمتوں میں بڑی گراوٹ کے باوجود اس کے ثمرات عوام تک نہیں پہنچ سکے، حکومت نے ’ سخاوت‘ کی انتہا کرتےہوئے پیٹرول کی قیمت میں 3 روپے 5 پیسے کی ’ بڑی ‘ کمی کردی ہے۔

وزارت خزانہ کی جانب سے جاری نوٹیفکیشن کے مطابق حکومت نے پیٹرول کی فی لیٹر قیمت 3 روپے 5 پیسے کی کمی کردی ہے۔ جس کے بعد اس کی فی لیٹرقیمت 227 روپے 19 پیسے ہوگئی ہے۔

وزارت خزانہ نے پیٹرول کی قیمت میں معمولی کمی کرتے ہوئے ڈیزل اورمٹی کے تیل کی قیمت میں بڑا اضافہ کردیا ہے۔

ہائی اسپیڈ ڈیزل کی قیمت میں 8 روپے 95 پیسے اورمٹی کی فی لیٹرقیمت میں 4 روپے 62 پیسے بڑھائے گئے ہیں۔ قیمتوں میں آضفے کے بعد ہائی اسپیڈ ڈیزل کی قیمت 244 روپے 95 پیسے فی لیٹر، جب کہ مٹی کے تیل کی نئی قیمت 201 روپے 7 پیسے فی لیٹرہوگی۔

دوسری جانب لائٹ ڈیزل آئل کی فی لیٹرقیمت میں 12 پیسے کی کمی کردی گئی جس کے بعد لائٹ ڈیزل کی نئی قیمت 191 روپے 32 پیسے فی لیٹرہوگئی۔

پیٹرولیم مصنوعات کی قیمتوں میں ردو بدل کا اطلاق آج رات 12 بجے سے ہو گا۔

واضح رہے اس سے قبل وزیرخزانہ مفتاح اسماعیل کی زیرصدارت ہونے والے اقتصادی رابطہ کمیٹی (ای سی سی) کے خصوصی اجلاس میں پیٹرولیم مصنوعات کی قیمتوں کے تعین کے لیے ڈالرکے اوسط ریٹ کا فارمولا اختیار کرنے کا فیصلہ کیا تھا۔

اجلاس میں پیٹرولیم مصنوعات کی قیمتوں کے تعین کے لیے آئل اینڈ گیس ریگولیٹری اتھارٹی (اوگرا) سے مل کردیگر امکانات پربھی غورکرنے کی ہدایت کی گئی جب کہ مٹی کے تیل اورلائٹ ڈیزل آئل کی قیمتیں ریگولیٹ کرنے کے لیے مشاورت کا فیصلہ کیا گیا تھا۔

وزیرخزانہ کو دی گئی بریفنگ میں کہا گیا تھا کہ پی ایس اوپرہائی اسپیڈ ڈیزل کی فروخت میں 28 فیصد اورپیٹرول کی فروخت بھی 32 فیصد کمی واقع ہوئی ہے۔