کیپٹن کرنل شیر خان شہید کے یوم شہادت پر آبائی علاقے میں پروقار تقریب کا انعقاد کیا گیا ہے۔

پاک فوج کے شعبہ تعلقات عامہ  (آئی ایس پی آر) کے مطابق کیپٹن کرنل شیر خان شہید، نشان حیدر کے 23 واں یوم شہادت کے موقع پر آبائی علاقے صوابی میں آخری آرام گاہ پر پروقار تقریب کا انعقاد کیا گیا۔

آئی ایس پی آر نے بتایا کہ تقریب میں آئی جی ایف سی میجر جنرل عادل یامین نے شہید کے مزار پر پھولوں کی چادر چڑھائی  اور پاک فوج کے چاق و چوبند دستے نے گارڈ آف آنر پیش کیا گیا۔

آئی ایس پی آر نے بتایا کہ تقریب میں کیپٹن کرنل شیر خان شہید کو بھرپور خراج عقیدت پیش کیا گیا  جس میں ہر شعبہ ہائے زندگی سے تعلق رکھنے والے افراد نے شرکت کی۔

آئی ایس پی آر کے مطابق تقریب میں  سول اور عسکری حکام اور شہید کے لواحقین نے بھی تقریب میں شرکت کی۔

خیال رہے کہ کارگل جنگ کے ہیرو کیپٹن کرنل شیر خان شہید، نشان حیدر کا 23واں یوم شہادت آج منایا جا رہا ہے۔

کیپٹن کرنل شیر خان شہید 1970 میں خیبر پختونخوا کے ضلع صوابی میں پیدا ہوئے۔

1999 میں لائن آف کنٹرول پر کارگل تنازعہ کے دوران، وہ جرات کی علامت بن کر ابھرے اور گلٹرے میں 17,000 فٹ کی بلندی پر پانچ اسٹریٹجک پوسٹوں کا دفاع کرتے ہوئے ہندوستانی افواج کو بھاری نقصان پہنچایا۔

کیپٹن کرنل شیر خان آج کے دن 1999 میں مادر وطن کا دفاع کرتے ہوئے شہید ہوئے اور انہیں ملک کے سب سے بڑے بہادری اعزاز نشان حیدر سے نوازا گیا۔